Pöllögg

Önnur sýning á einþáttungadaxkrá hugleix, Ó þessi tæri einfaldleiki, var í kvöld í Listasafni Reykjavíkur fyrir pakkfullu húsi. Verður í allra síðasta sinn annað kvöld.

Klukkan 20.00

1500 kall inn

Miðapantanir hér

Enginn hefur enn þorað að segja annað við mig en að þetta sé skemmtilegt. Fékk að gera hitchcockska innkomu í eigið stykki í kvöld og vera þýskur túristi um stund. Gaman að vera búin að því. Annars er ljómandi skemmtilegt að "koma fram" svona einu sinni. Gerður er góður rómur að þessu sem við erum að tónlista á milli hinna eiginlegu atriða.

En svo fer þetta nú bara að verða búið og menn fara aftur að kreppast heima hjá sér á kvöldin. Næsta mál á dagskrá er að reyna að ná síðasta horinu úr litlu ormunum svo hægt verði að halda áfram á sundnámskeiðinu í næstu viku. En þau eru búin að vera óttalega rotinpúruleg, Freigátan fór t.d. ekki nema hálfan dag á hinn langþráða leikskóla í síðustu viku. Sjálft Móðurskipið var meira að segja svo illa úldið í dag að ég lufsaðist varla á lappirnar fyrr en undir kvöld. Rannsóknarskip, sem þó fékk að fara í frumsýningarpartí í gærkvöldi, mátti gjöra svo vel að sjá nær alfarið um heimilið. En þetta er nú vonandi allt orðið skárra.

Og vonandi tekst mér að koma Glettingnum afganginn af leiðinni í prentun um helgina. Og þá fara bara að koma jól. Eða hvað?

Stubbar

Einu sinni var agnarsmá Ég. Ég átti tvo stóra bræður. Þeir hétu Ríkisstjórn og Útrásargaur.

Dag einn fóru stóru bræður mínir að skíta peningum. En þeir sögðu við Mig:

Þú mátt ekki skíta peningum af því það er ekkert kúl að skíta peningum ef allir eru aððí. Einhverjir verða að halda áfram að vera fátækir og Þú ert svo lítil.

Við þurftum allir að fara til útlanda. 

Ég spurði: Viljið þið vera samferða?

En þeir Ríkisstjórn og Útrásargaur svöruðu: Ne-hei! Þú mátt sko ekki koma með á einkaþotunni okkar því það er ekkert kúl að vera á einkaþotu nema einhverjir ferðist áfram á svona skíta-venjulega farrými. Og Þú ert svo lítil!

Á leiðinni út í heim hittum við Útlending. Ríkisstjórn og Útrásargaur tóku bara af honum peningana hans og sögðu svo: Farðu burt, heimski hundur!

Mér datt ekki í hug að vera vond við Útlending.

Ríkisstjórn og Útrásargaur fengu sér ný föt sem kostuðu eina og hálfa milljón. Varla þarf að taka fram að Ég fékk engin ný föt. Þið megið geta einu sinni af hverju.

En auðvitað er ekkert hollt að skíta peningum til lengdar. Núna eru Ríkisstjórn og Útrásargaur bara komnir með magapínu og harðlífi og allt er stopp hjá þeim. Þeir ná ekki meiri peningum úr rassgötunum á sér svo bráðum fæ Ég fínu fötin þeirra á nauðungaruppboði. Einkaþotan fer þangað líka en hana nenni ég nú ekki að kaupa af því að Ég er ekki fáviti, þó Ég sé lítil. Áður en síðasta flugfélag bræðra minna fer á hausinn ætla ég síðan bara að fara til Útlendings sem man alveg að Ég var ekkert vond við hann, þó hann sé vissulega ósáttur við bræður mína, og leyfir mér að vera þar til skítalyktin heima hjá mér verður horfin.

Þá sitja bræður mínir einir eftir hér með sína óleysanlegu garnaflækju.

Ég gæti svo sem reynt að bjarga þeim en Ég er of lítil.

Afmæli!

Annað kvöld er frumsýning á afmælis-einþáttungadagskrá Hugleiks í Listasafni Reykjavíkur. Nánari upplýsingar hér. Miðapantanir hér. Sýningar verða föstudag 31. okt., laugardag 1. nóv. og sunnudag 2. nóv. Miðaverð virðist vera leyndó, en ég myndi giska á verðbilið 1000 til 1500 verðlausar krónur.

Og þarna látum við hjónin nú aldeilis vaða á súðum. Ég skrifa tvö verk, Rannsóknarskip eitt, við leikstýrum einu hvort auk þess sem ég tek þátt í einhverjum tónlistargjörningum á milli þátta og inni í sumum. Og ég held þetta sé bara ekkert svo leiðinlegt.

En ég er nú samt að upplifa hroðalega erfið þrjú kvöld í röð núna. Það þarf víst að láta passa á meðan við erum á tveimur síðustu æfingunum og frumsýningu. Mér fannst það meira að segja agalegt áður en Hraðbáturinn öskraði í klukkutíma hjá Huggu móðu í gær. Í kvöld verða fleiri á vaktinni. Bjarkey mágkona ætlar að vera aðal(barna)pían Siffi bróðir verður með, ef hann verður ekki í vinnunni sökum góðæris, og Hugga móða kemur kannski á seinni vakt eftir námskeið hjá sér. Móðurskipið hefur áhyggjur af þessu og verður að segja það. Sem sagt, áhyggjur af geðheilsu og heyrn barnapíanna. Börnin eiga hreint ekki eftir að bíða neinn skaða af því að þjálfa lungun aðeins. En þau hafa hins vegar ágætisrödd...

Og Freigátan vaknaði með gráti og gnístran tanna um miðja nótt. Hana hafði dreymt að endur væru að lemja pabba og mömmu. Hún hefur kannski heyrt okkur tala um áhorfendur og misskilið eitthvað...

Til að reyna að redda einhverjum úrræðum fær Hraðbátur hraðkennslu á pela í dag... veit svosem ekki hverju það skilar svona á einum degi.

Ég held ég láti líða nokkur ár þangað til við Rannsóknarskip tökum aftur þátt í sama verkefni.

Framhaldinu verður svo bróðurlega skipt. Hann fær að fara í frumsýningarpartí, en ég fæ að sýna tvær sýningar í viðbót. Rómó.

Hverjir eru hryðjuverkamenn?

Samkvæmt þessum fáránlega lista tjallanna eru allir í Kongó, Íran, Írak og Sýrlandi hryðjuverkamenn. Þess vegna eru viðskiptabönn á þessum löndum og helst enginn í þeim má fá að éta. Allavega ekki í boði engilsaxa.

Í dag virðast margir innrásaherir sem ráðast inn í lönd án þess að lýsa yfir stríði ekki vera hryðjuverkamenn. Þeir sem þar eru fyrir og reyna að verja hendur sínar eru það, hins vegar.

Er maklegt og réttvíst að einhver þjóð sé á þessum lista? Eru ungabörn í Búrma sjálfkrafa hryðjuverkamenn? Við skulu athuga að þessi listi, og þessi fáránlegu og mannréttindaþverbrjótanadi lög meððí, er samsettur af ómarktækum taglhnýtingum forsetafávita í Bandaríkjunum sem sagan á eftir að skoða við hliðina á Gogga fjórða í bresku konungasögunni. Í rauninni verið að hengja heilu þjóðirnar fyrir stjórnir þeirra. Svolítið eins og þegar Íslenska þjóðin á núna næstu öldina eða svo að vera að borga skuldasúpuna fyrir sofandahátt síðustu ríkisstjórnar og nokkra ævintýramenn. 

Það hvarflar ekki að mér að skrifa undir varnarlistann sem segir að Bjólfarnir séu ekki hryðjuverkamenn. Mér sýnist líka vera algjörlega tilviljunum háð hverjir eru "hryðjuverkamenn" í dag. Svolítið eins og hverjir voru "kommúnistar" í Bandaríkjum kalda stríðsins.

Og jafnvel maklegra að Íslendingar teljist til hryðjuverkamanna en margir aðrir. Vorum við ekki á Lista Viljugra Fávita í stærsta hryðjuverkinu í þessu kjaftæði öllu saman? Það sér nú ekki enn fyrir endann á því þó svo að fréttir af því að það sé verið að plaffa niður slatta af báðum hliðum falli algjörlega í skuggann af Kreppunni sem engan hefur drepið enn.

Í boði Dabba hryðjuverkakóngs ættum við öll að vera á þessum lista. Tvisvar.

Ef:

- menn ætla virkilega að láta venjulega fólkið borga útrásarkjaftæðið með skattpíningum

- það á einu sinni enn að brúka niðurskurðarsaxið á heilbrigðis-, mennta- og félagslega kerfið

- við eigum að sitja í handónýtu skuldasúpunni með skeinipappírsvirði gjaldmiðil þangað til næsta loftbóluævintýri kemur og bjargar málum tímabundið

- Geir og Grani ætla að sitja sem fastast á valdastólunum sem þeir eru búnir að skíta í og ætla ekki að fara að drullast til að VÍKJA þar sem þeir hafa ekki rassgatsvit á því hvað þeir gjöra

- Sjálfstæðisflokkurinn verður enn í ríkisstjórn eftir næstu kosningar (sem verða vonandi fyrr en 2011.)

Þá er mér skapi næst að fylgja landflóttanum og yfirgefa skerið. Helst vildi ég taka alla stórfjölskylduna með og ef allt fer jafnlangt til fjandans og menn virðast vera að spá er nú bara aldrei að vita hvað menn gera.

Enn sem komið er held ég að við verðum ekkert í svo svakalega vondum málum. Erum svosem vön að lifa af litlu. En ég er að fara í meiri og meiri fýlu yfir þessu. Þessi svokallaða útrás kom langflestum í þjóðfélaginu ekkert við. (Og þá er ég ekki að tala um útflutning í neinum skilningi. Bara banka og loftfyrirtækjabullið.) Auðmenn, seðlabankastjóri og ríkisstjórn benda hver á annan og mér er eiginlega alveg skítsama hverjum þetta er alltsaman að kenna. En ég nenni ekki að borga fyrir það. Ég myndi láta mig hafa hvað sem væri ef kreppan væri jafn alheimsk og ráðamenn vilja vera að láta. En staðreyndin er að hér er ofurkreppa sem er örfáum örvitum að kenna. Og enginn þeirra skammast sín einu sinni!

Þessi ákvörðun varð til innra með mér í gær. En undanfarið hef ég samt misst, áður ódrepandi, áhuga á fasteignavefnum, hinum íslenska. Hef í staðin lent í auknum máli á eitthvað flakk um fasteignavefi erlendis. Er nú bara svona að átta mig á því hvað hlutir þýða. Hvernig markaðir eru á eign vs. leigu. Hvað skiptir máli hvar. Og ekki síst hvaða gengi er á gjaldmiðlum. En ég hef svolítið verið að lenda til Kanada. Og þetta líka fína leikritunarprógramm í York háskóla í Toronto. En svo skemmtilega vill til að 2011 er einmitt inntökuár.

Já, ég miða við árið 2011. Ég huxa að þá verði komið í ljós hvort kreppan er komin til að vera. Hvað verður eftir af heilbrigðis- og menntakerfinu. Hvort verður lag að skipta út íbúðinni fyrir sumardvalaríbúð á Egilsstöðum eða í Eyjafirði. Hvort við verðum búin að borga niður nógu mikið af lánum til þess að andvirði íbúðar dugi fyrir því sem eftir er.

 

...og í því hófust fréttir og stýrivextir eru að hækka í 18%.

Það er svosem líka inntökuár í leikritunardeildinni í York háskóla 2009...

Allt. Næstum allt.

Errðetta ekki týpískt? Eina helgina ákveður maður að sleppa örlítið fram af sér beislinu og fara í leikhús og á syngjandi fyllerí, sem maður þyrfti ennndilega að fá smá tíma til að jafna sig á, en þá brestur á með öllu í heiminum. Glettingur kominn úr umbrotinu og nú langar mig að klára hann og koma honum út í einum grænum og hvínandi hvelli.

Svo fór ég einhvern veginn afturábak inn í leikstjórn í Hugleixprógramminu sem er um helgina (og ég þarf að plögga í sér pósti) ásamt því að vera í einhverjum undarlegheitahóp sem leikur sér á milli þátta. Er reyndar bara með örstuttan "bekkett" eftir sjálfa mig og ætla að hanna hann á 45 mínútum í dag. En það er nú alveg hægt að verða stressaður yfir því, ef maður vill. Líka hægt að stressa sig yfir því að Hugga móða þarf að passa sem aldrei fyrr, við hjón þurfum bæði að vera á rennslum (Rannsóknarskip reyndar ekki nema að hluta til) á miðvikudax- og fimmtudaxkvöld.

Yfir því er nú ekkert mál að verða illa samviskubitinn og fá kvíðaröskun.

Sem betur fer þarf ég ekki margt að gera í þessari viku. Ja, nema lesa Lér konung. Og Skugga-Svein. Og helst komast yfir handrit að leikgerð Ágústu Skúla á því verki, líka. Og lesa það og ákveða hvaða vinkil ég ætla að brúka í ritgerðinni. Arrrg... líka alveg hægt að láta líða yfir sig af verkfælni yfir þessu líka.

Annars er Rannsóknarskip í vetrarfríi í dag og Freigátan með smá hor þannig að hún fékk að vera heima að tjilla. Og ég er bara búin að hanga í tölvunni, Glettinga og leika mér og er að hlusta á Jólaævintýri Hugleiks. Sem er alls ekki jólaplata nema að mjög litlu leyti.

Jámjám.

Ást er fyrir hálfvita og kynvillinga...

Við kunnum ekkert að mótmæla

Hvar er Saving Iceland nú?