Þetta finnst mér

flott.

Viðskiptafræði

Ég meikaði allt góðærið án þess að langa baun til að skilja í þessu banka- viðskipta- verðbréfa- nasstakk- bulli. Mér þóttu bara gengis- og verðbréfafréttirnar fyrir fréttir á Stöð 2 og í lok tíufréttanna á RÚV vera svo átakanlega leiðinlegar að ég var oft næstum dáin við að þrauka það. En núna er ekki laust við að mig langi stundum til að botna pínulítið í því hvað er að gerast. Sérstaklega þar sem menn virðast hreint ekki sammála um það. Erum við í skítnum? Er hann djúpur? Er betra að taka lán hjá Rússum eða Alþjóðagjaldeyrissjóðnum? Eða einhverjum allt öðrum? En á einhver peninga? Eftir það sem á undan er gengið er ég farin að halda að allir þessir peningar sem verið sér að veifa til okkar séu lúftpeningar.

Og ég heyrði því fleygt að "gatið" sé uppá 10 milljarða dollara. Ókei. En hvað varð um þá? Voru þeir aldrei til? Hvernig var hægt að byggja útrásarkjaftæðið á peningum sem aldrei voru til? Hefði ekki einhver viðskiptafræði- hagkerfismógúll átt að koma auga á það?

Reyndar er eins og mig minni að margir hafi verið með bölmóð og hrakspár í góðæringu. En þar sem þessi líka stólpakláru stjórnvöld og gaurarnir sem stjórnuðu bönkunum með 65 milljónir í mánaðarlaun sáu ekki ástæðu til að hlusta á það hélt ég að það væri bara svona svartagall. Í ljós kom þokkalega allt annað.

Og hvað er að gerast núna? Jú, við þurfum að fá einhverja 10 milljarða dala lánaða. Og mér þykja stjórnvöld og kallarnir sem ráða taka því bara nokkuð létt. Ríkukallarnir, seðlabankastjórarnir og forsætisráðherra kenna hver öðrum um og vilja ekki láta leita að sér. Og reyna svo að selja manni þær fréttir að þetta sé nú allt að reddast, á íslenska vísu. "Við tökum bara meiri lán." Á meðan halda áfram að berast fréttir frá kláru köllunum sem spáðu fyrir um þetta allt saman, að hlutirnir séu miklu verri en ennþá sést og að Geir sé enn að fokka upp svo ekki sé minnst á seðlabankann. Þetta er alltsaman borið til baka. Jafnharðan. "Við tökum bara meira lán." Ég get ekki gert af því að ég hef talsverða tilhneygingu til að trúa frekar svartgöllurum. Svona eftir fyrri reynslu.

Annars er ég ánægð með hvað almenningur virðist taka þessu öllu saman af mikilli stillingu. Meira að segja þeir sem eru að tapa miklum peningum, jafnvel öllu sínu, virðiast vera að jafna sig eftir mesta sjokkið. Og enginn virðist velkjast í neinum vafa um að það besta í lífinu sé ókeypis. Auðvitað eru menn ekki farnir að finna fyrir þessu tapi ennþá. Kannski verðum við öll minna kokhraust í 100% verðbólgu, atvinnuleysi og skuldafeni. Það á eftir að koma í ljós.

Ég fagna innilega endalokum góðærisins og því að fá tækifæri til að ala börnin mín upp í kreppu og verðbólgu (eins og ég ólst upp við) frekar en á öld alheimsfrekju. Þó er ekki laust við að talið um Nýja Ísland sé farið að fara örlítið í taugarnar á mér. Verðmætamat virðist allt á leið til aukinnar skynsemi. En þetta er samt eiginlega alveg gjörsamlega farið yfir væmnisþröskuldinn á mér. Allt þetta faðm og hvað ha? Það er ekki einu sinni orðið almennilegt tilefni til hughreystingar. Og menn eru bara strax að tapa sér í smeðjunni? 

Og selfölgeligheda auglýsingarnar á Skjá einum? Þessar sem segja manni það sem maður veit, bara væmnar. Ég veit það ekki. Þær voru kannski hughreystandi í "sjokkinu" í síðustu viku. Svona fyrir þá sem áttu eitthvað til að tapa. Núna eru þær svolítið hallærislegar og kjánahrollvekjandi. Gera ráð fyrir að flestir hafi gjörsamlega tapað raunveruleikatengingunni í skuldasöfnunaræði undanfarinna ára. Vona að menn ætli ekki að bjóða sveltandi lýðnum upp á þessi skilaboð á mánuðum komanda. Þá er ég nú hrædd um að nokkrir flatskjáir verði fyrir fljúgandi furðuhlutum.

Það er nefnilega þannig að þó öld vatnsberans virðist gengin í garð, núna í góðærisleifunum, þá eru miklu meiri líkur á paunki þegar harðnar í ári. Réttlátri reiði og mjög massívri leit að sökudólgum. Sem ég vona, þeirra vegna, að verði búnir að hafa vit á að segja af sér og koma sér í skjól. Helst í útlöndum. Samt ekki Bretlandi.

Og eitt enn. Nú er ljóst að menn þurfa að reyna að spara. Enginn veit hvort einhver fær útborgað um næstu mánaðamót. Og það er ljóst að afborganir af lánunum okkar eru síst að fara að lækka. Né heldur verðlag, almennt. Á sama tíma eru menn hvattir til að kaupa. Annars stöðvast "hjól hagkerfisins."

Ég hef tilhneygingu til að halda mig við nauðþurftirnar í bili og huxa eins og Doktor Gunni að hjól hagkerfisins geti bara hoppað upp í rassgatið á sér.

Eitt og annað

Ég eignaðist barn í nótt. Annan strák sem var alveg eins og Hraðbáturinn, nema með heilmikið og hvítt hár. Fæðingin gekk hreint undravel fyrir sig en Rannsóknarskip missti af henni þar sem hans var enn saknað eftir fyllerí kvöldsins áður. En ég hafði nákvæmlega engar áhyggjur af því. Huxaði bara sem svo að hann myndi skila sér fyrr eða síðar, enda var ótrúlegasta fólk saman komið til að hjálpa mér og aðstoða í kringum þetta allt saman.

Fyrir hverju ætli svona draumur sé? Snjóþungum vetri? Þetta var allavega "sveinbarn sé og sjálfur eigi" svo líklega er þetta ekki endilega fyrir "böli."

Annars er mögnuð lífsreynsla að þramma framhjá Svörtuloftum og höfuðstöðvum Kaupþings í kulda og rigningu með tónlist snillinga í ípottinum. Fyrir tilstilli örlagavalda randomsins voru þeir bræður Cave og Cobain áberandi í eyrnakonfekti morgunsins. Rigning, Seðlabankinn, drungi og grunge. Ég æfði mig í að fíla kreppuna á leiðinni í jóga og ungbarnasund.

Freigátan var á leikskólanum í fullan leikskóladag í dag. Fyrir utan að hún borðaði ekkert í hádeginu og svaf ekkert í hvíldinni var hún víst alveg eins og engill.

Og Dr. Gunni er góður aftan á Fréttablaðinu í dag. Ýmislegt hef ég nú lesið sem ég er sammála og þá ekki síst undanfarna daga en þarna var nú bara næstum liðið yfir mig af sammáli.

Smábátur rúllaði upp einu samræmdu prófi í morgun og gerir væntanlega slíkt hið sama á morgun. Annað kvöld heldur hann síðan norður yfir heiðar og verður í heila viku þar sem nú fara í hönd starfsdagar og vetrarfrí í skólanum hans. Rannsóknarskip er líka kannski að fara í partí annað kvöld en ætlar vonandi ekki að drekka sig týndan fram að næstu barneign.

Pabbi minn er ríkari en pabbi þinn!

Er búin að leita mikið að þessu á öldum vefheima. Þetta var snilld fyrir Hrun, og er núna algjörlega gargandi brjálæðislega fyndið. Þetta er greinilega diskur sem verður gert ráð fyrir í fjárlögum heimilisins. Þrátt fyrir Kreppu og Ingólf.

Jibbúleeer

Freigátan var skilin eftir í leikskólanum klukkan 10 í morgun. Og var hin hamingjusamasta með það. Búin að fara í heilmikinn "leik" inni, syngja og allskonar. Við Hraðbátur fórum bara í jóga eins og enginn væri morgundagurinn. (Hann reyndar frekar sybbinn, varð af morgunblundinum út af aðlögunarstuðinu á leikskólanum.) Ekki nóg með þetta. Ég heyrði í leikskólanum fyrir skemmstu. Unga daman svaf eins og steinn í hvíldinni. Ég lagði svo á og mælti um að hún fengi að sofa eins og hún vildi og ég sæki hana aftur klukkan hálfþrjú. Úr þessu varð semsagt næstum fullskipaður leikskóladagur, og verður væntanlega lengri á morgun. Hraðbátur sefur á sitt græna og ég ætti vitaskuldir að vera að læra.

Námskeiðið hjá honum Ingólfi í Spara í gær var mikil snilld. Og örugglega ennþá meiri fyrir þá sem sáu fram á eitthvað vesen varðandi erlend lán og allskyns. Hann gat gefið þeim voða góð ráð. Annars sagði hann mönnum að hafa ekki áhyggjur af þessari kreppu og að hún hefði engin áhrif á það sem hann predikaði. Nú kann ég sumsé að gera okkur ennþá efnaðri og auðugri en við erum nú þegar, með skuldauppgreiðslum og allskonar sparnaðaraðferðum, án þess að auka greiðslubirgði eða neitt. Mikill snillingur þessi maður og allt um það má lesa á spara.is. Hann hefur líka gefið út bók sem heitir eitthvað. Og hann tiltekur það svo sem ekki, en ég sé í þessu megrunarmöguleika í leiðinni. (Sem og reyndar kreppunni allrisaman.)

Bezt að reyna að lesa einn kafla um harmleiki áður en Hraðbátur fer aftur á skrið.

...það verður engin fjandans hæna!

Freigátan er á leikskólanum. En við Hraðbátur erum heima. Hún verður aaaaalein í leikskólanum fram yfir hádegismat í dag. Móðurhjartað reynir að vera ekki á tauginni. Er samt ekki að verða neitt gríðarlega mikið úr verki.

Ætla á eitt námskeiðið enn í kvöld. Læra að borga skuldir og spara hjá honum Ingólfi í spara.is. Oft var þörf en nú er möst, eins og maðurinn sagði. Klappaði, stappaði og gólaði á tónlistarspunanámskeiði í allan gær. Er alveg að verða búin að námskeiða yfir mig. Og fékk skemmtilegt heimaverkefni. 3 - 5 góðar setningar úr gömlum Hugleiksleikritum. Tillögur? (Btw, fyrirsögnin er ein slík.)

Svo er ég að huxa um að fara að reyna að vera skemmtilegri.

Mér finnst ég vera búin að vera alveg heltekin af því að þurfa alltaf að hafa allt á hreinu. Núna þegar allt er orðið í volli á heimsvísu hlýtur maður aðeins að geta farið að slaka á og hætta að reyna að vera alveg gjörsamlega al-fullkomlega með á öllum nótunum, alltaf.

Annars tók ég gítarinn minn úr töskunni sinni í gær, og stillti hann, Guð láti gott á vita.

Alveg rétt!

Það var að rifjast upp fyrir mér að um daginn fékk ég alveg fáránlega tarottsppá. Ég bloggaði um að ég fékk eina alveg fantagóða. Einmitt þess vegna prófaði ég aftur, nokkrum dögum seinna. Sú var... undarleg. Útkoman úr henni og svona, það sem ég vildi gera, var áfram fantagott. En allt í kring var ekkert nema hrun, missir, sorg, bæði dauðinn og djöfullinn og ég veit ekki hvað. Ég hef aldrei séð annað eins. En svo var útkoman svona líka svakalega fín. Fyrir mig. Ég sat lengi og spáði í spilin. Þetta var greinilega afskaplega merkileg spá. Rosalega mikið af merkilegum spilum á mikilvægum stöðum. En útkoman í þessu var undarleg og þetta var allt mjög... skrítið.

En nú er þetta morgunljóst.

Í þessari kreppu verð ég gæfusöm eins og mý á mykjuskán.

Og þetta er nú Ljóti Hálfvitinn.

Tvennt

er ég farin að lesa af óvenjumikilli áfergju. Það er Baggalútur og blogg Dr. Gunna.

Miklu meira möstríd í kreppunni heldur en mbl og visir.is.