Fór á rúntinn, fann Seláshverfi (það er staðsett lengst, lengst, næstum í Mosfellsbæ) fann blokkina sem íbúðin "mín" á heima í, og skoðaði hana að utan.
(Er ekki enn búin að finna hjá mér kjark eða þor til að hringja í manninn sem sýnir hana.)

Þegar ég kom þangað var bara sól á Seláshverfinu en þungbúin ský allt í kring. Ákvað að það væri tákn nr. 1. Annars er þetta ógurlega lítið og fallegt hverfi, lengst úti í sveit og rétt hjá reiðhöllinni... villtist aðeins þangað í leiðinni.

Þegar ég kom heim voru síðan í fréttunum einhver svakaleg húsnæðislán hjá KB banka og fleirum. Jámjám. Tákn nr. 2.

Kannski ég ætti að fara að drífa í að gera þetta þrennt sem ég þarf að gera fyrir greiðslumat? Hmmmm. Er reyndar þungt haldin af eignamöppuveiki. Hún lýsir sér þannig að þegar ég er búin að setja eignir í eignamöppuna sem ég er búin að stofna mér á mbl.is þá finnst mér ég eiga þær. Mín íbúðakaupamál eru sumsé orðin svolítið eins og tölvuleikur. Gerast bara í tölvunni en hafa engin áhrif á raunveruleikann.

Er allavega búin að ákveða að ef alheiminum finnst að ég ætti að búa í íbúðinni sem ég er skotin í, þá bíður hún eftir mér þangað til ég nenni að:
a) Flytja lögheimilið mitt til Reykjavíkur
b) Fá mér afrit af skattframtalinu mínu
c) Fá yfirlit yfir hvað ég skulda lánasljóðnum
d) Finna leið til að ljúga greiðslumatinu mínum upp í 10 milljónir
e) Gera tilboð

Þetta ætti ekki að taka nema svona rétt fram á næsta ár...

Sigga was a Rich Bum in a past life. Discover your past lives @ Quiz Me

Það var nefnilega það... útskýrir ýmislegt!

Í fréttum er þetta helst:

- Er orðin alvarlega ástfangin af einni íbúð.
Hún er reyndar:
a) Lengst uppi við Rauðavatn
b) Á jarðhæð
c) Algjörlega óskoðuð af minni hálfu, fyrir utan myndir á netinu
d) Trúlega allt of dýr fyrir mig

Fyrir utan það að ég er ekki neitt komin einu sinni hálfa leið með að klára að redda gögnum í greiðslumat, eða ákveða hvort ég ætla að gera það núna eða bíða með það og sjá til hvort eitthvað kemur út úr atvinnubröltinu mínu.

Sótti annars um annað hlutastarf áðan... á fasteignasölu.
Það bara lá eitthvað svo beint við...

Fór annars og menningarnóttaði í svosem klukkustund á laugardaginn. Þar með var mitt úthald í fullan miðbæ af fólki útrunnið.

Þarf að finna verkstæði til að láta setja gúmmíkanta í gluggana á Fífí og láta yfirfara hana í hvívetna, svo á hún að fara í skoðun í september. Þar fer fjársýsla heimilisins væntanlega fjandans til, svona í bili.

Stórmerkilegt.
Í gær var ég ég áframhaldandi íbúðapælingum, velti fyrir mér ýmsu og komst að því að eiginlega vantaði mig meiri peninga... það allavega... svona... kæmi sér alveg vel.
Spurði sem svo:
- Hvernig nær maður í meiri peninga?
- Maður fær sér meiri vinnu.
Svaraði Gvuð.

Ég á atvinnuauglýsingavefinn í mogganum, með hálfum hug þó, yfirleitt er hann ekkert vaðandi í seinnipartsvinnum sem ég kann. Haldiði ekki að þeir hafi verið nýbyrjaðir að auglýsa ritara/bókara starf, vinnutími frá 14 - 18. Byrja í september.

Mér duttu allar dauðar lýs úr höfði, hamraði saman umsókn og starfsferil, sem er allur morandi í bókhaldi og ritarastörfum, og sendi inn. (Undirstrikaði það sem hljómar vel, þetta með að vera utan af landi og þannig...)
Þetta væri náttlega ekkert sérstaklega amalegt. Miðað við að byrja að vinna í september ætti greiðslumat að geta orðið alveg prýðilegt í kringum 1. des.
En, gáum hvað gerist. Kannski eru þetta asnakjálkar sem vilja ekki borga neitt af viti. Eða vilja ráða einhvern með stærri brjóst...

Svo er bara að renna upp menningarnóttarhelgi. Er að huxa um að menningarnótta, svona allavega seinnipartinn á laugardag, í fyrsta skipti á ævinni!
Hef alltaf verið að gera eitthvað annað á menningarnótt og aðfaradag, þannig að nú er ég að huxa um að menningarsnobba feitt.

Hmmm...
Bankinn sem býr til greiðslumatið vill fá lánsloforð...
Viðskiptabankinn, sem er sá sem býr til lánsloforðin, vill fá greiðslumat til að geta gefið lánsloforð...

Búin að stofna mér eignamöppu á mbl.is sem í er kominn haugur af íbúðum sem ég nenni ekki einu sinni að skoða fyrr en ég veit hvort ég gæti haft efni á þeim.

Hvort kom eiginlega á undan hænan eða eggið? Eins og er vilja bæði bíða eftir hinu.

Snúið.

(Það fór þó aldrei svo að það kæmi ekki annað langtímaverkefni til að blogga um þegar MA ritgerð sleppti. Framhaldssaga næstu mánaða, jafnvel ára, verður um ævintýri í heimi fasteignaverslunar.)

Fór í gær og fylgdist með á meðan Hugrún syss verslaði sér flunkunýjan bíl uppá grilljónir. Það veitti mér mikinn innblástur og löngun til að eyða mörgum milljónum í einu. Auk þess gaf hún mér nokkur galdraráð til íbúðaverslunar.

Síðan fór ég heim með grænuna, sem verður nú í minni umsjá, komst að því að hún þarf að fara í skoðun í næsta mánuði og laga þarf eitt og annað. Ojæja. Svo fjarlægði ég úr henni sérvisku formæðra minna, daunillt yfirklæði sem hefur undanfarin 25 ár komið í veg fyrir að sætin eldist í samræmi við annað í ökutæki þessu. Í ljós kom þetta fína sætaáklæði sem lítur út eins og árið sé um 1980. Í tilefni þessa fór ég á smá rúnt með Júriþmix í botni.

Nú er ég að huxa um að hringja í bankastjórann minn og spyrja sem svo:
- Hurðu? Má ég fá milljón til að kaupa mér íbúð?
Ímynda mér að hún svari:
Jájá, ekkert mál! Borgaðu svo bara þegar þú verður rík.

Er þetta ekki líklegt?

Jæjah.
Til að sækja um greiðslumat þarf að hafa afrit af skattframtali.
Betra er að framtalið sé rétt. Og mitt er það ekki. Er búin að senda bréf og gögn til leiðréttingar á skattframtali í morgun. Og svo er bara að bíða. Það er nú eiginlega ekki líklegt að ég fari almennilega af stað á húsnæðismarkaðinn fyrr en um áramót...

Æfingar á Petru minni í fullum gangi. Nú eyði ég kvöldunum mínum í tómum æðisköstum og tilfinningalegum krísum... hmmm... nei annars. Það er ekkert nýtt. Texti er allavega óðum að lærast og persónur eitthvað að finnast.

Og, í þessum orðum skrifuðum hringdi í mig stórgróserinn hún Hugrún systir mín, hún er búin að kaupa sér alveg flunkunýjan bíl og ætlar að sækja hann (í verksmiðjuna?) á eftir. Þar með fæ ég grænu fífí hennar ömmu og verða það nú fagnaðarfundir.

Best að fara á fasteignasíðuna og skoða eignir með bílastæðum...