Fallin

Hefi að undanförnu háð hildi við drepsótt nokkra.
Er nú fallin í valinn ok veit eigi hvort endurkomu vorrar í mannlegt samfélag má vænta um sinn.
Hann Flensuður Fáráður er óttalegr ádámr.

Menntakerfið

gleypir og spýtir fjölskyldumeðlimum á víxl, þessa dagana. Ég var að fá bréf, er formlega að fara að setjast á skólabekk í haust. Rannsóknarskip er að fara að syngja á nemendatónleikum annað kvöld, vænanlega sínum síðustu í bili. Þar með er menntakerfið búið að sleppa af honum klónni... þangað til í haust þegar allar líkur eru á að hann fari að kenna einhversstaðar.

Tekið skal fram að tekjur heimilisins koma til með að aukast um helming þegar hann fer að kenna og ég fer á námslán. Þá vona ég að við getum hætt öllum aukaverkefnum... (þ.e.a.s., þeim sem flokkast undir "vinnu") og dinglað okkur á kvöldin. (Sem þýðir að hann getur farið í kór, ég get skrifað meira, og svo getum við leikið og leikstýrt í Hugleik eftir behag. Svo ekkert er meira svona, "ekkert".)

Núna erum við alveg ferlega þreytt eftir veturinn. Elsku Rannsóknarskipið mitt er með eitthvað eilífðarkvef sem mér finnst hann hafa haft stanslítið í vetur. Og ég er með ofþreytu í mörgum formum. Ég held við þurfum alvarlega að hugsa um að hægja á okkur, ef við eigum ekki að missa heilsurnar endanlega ofan í klofin á okkur.

Ég er búin að vera nokkurn veginn þunglyndislaus seinnipartinn í vetur. En það er nú ekki tekið út með sældinni. Áður gerði svarti hundurinn nú það að verkum að ég hvíldi mig stundum alveg út í hið óendanlega. Í vetur er ég hins vegar búin að vera fullkomlega bremsulaus. Og er að súpa seyðið af því.
Lífið er línudans.
(Og ég hrín á alla sem muna Embættismannahvörfin að fá ákveðið lag á heilann.)

Og svo fann ég lag, sem er í eðli sínu, að hluta, letilag.

Pöllögg

Miðasala er hafin á sýninguna á Listin að lifa sem verður í Þjóðleikhúsinu þann 7. júní. Hér.

Merkilegri fréttir

En fréttir heimilisins eru þær að elsku litla Freigátan, sem mér finnst hafa fæðst í fyrradag, er komin inn á leikskóla. Hún komst inn á leikskólann Ægisborg og byrjar líklega þar í haust. Hann er reyndar alveg hinumegin í Vesturbænum svo við erum með hana á flutningslista ef eitthvað skyldi losna nær áður en hún byrjar. Við mátuðum annars leikvöllinn á Ægisborg í morgun, og hann er RISAstór, auk þess sem þessi leikskóli er með áherslu á tónlist og eitthvað. Þannig a' kannski móðurskipið láti sig nú bara hafa þessa ferð á morgnana og eftirmiðdaginn, allavega næsta vetur, svo rassinn á því stækki nú ekki allt of mikið á skólasetunni.

Freigátan er annars að stækka svo mikið og þroskast þessa dagana að það er alveg meiriháttar að fylgjast með því. (Ekki að allur hreyfiþroskinn sem fylgir sé svosem alltaf sérlega þægilegur.) Nýjasta æðið er að príla upp á hvað sem fyrir verður. Og hoppa. En hún talar ekkert ennþá. Hún hermir eftir málróm og atkvæðafjölda þess sem maður segir við hana, en ekki orðum. það finnst mér nú merkilegt. Eins og reyndar flest annað við þetta merkilegasta sköpunarverk mitt til þessa dags.

Fréttir

Mér fannst skemmtilegt að fullklædd kona, frjálslega vaxin, sem söng vel og á frummálinu, skyldi vinna Júróvísjón. Mér fannst líka gaman að konurnar á sviðinu með henni skyldu ekki dansa. Ég skildi ekki alveg beygjurnar í hárinu á þeim... en það er önnur saga. Annars tók tónlistarsmekkur minn undarlega beygju í keppninn og ég var tekin að heillast mjög af lögunum frá Búlgaríu og Georgíu. En þetta var nú bara gaman.

Ég nenni ekki að mynda mér skoðun á kosningum, fyrr en ég sé hvernig ríkisstjórn verður. Þá, kannski.

Kusum

Fjölskyldan mínus Smábátur fór í dag og kaus. Í ráðhúsinu. Það er kalt úti en samt eru allir þar. Mæli engan veginn með því að reyna að vera á bíl í bænum í dag. Eða einu sinni með barnavagn. Ég er þunn, Rannsóknarskip er þreyttur eftir að hafa vaknað með Freigátunni eldsnemma í morgun. Þau eru að leggja sig.

Ég er að huxa um að setja allra fyrstu þættina af Friends í DVD-arann og gera slíkt hið sama.

Best að byrja bara aftur á þessum degi.

En gaman var í pottinum hjá henni Hrefnu í Bingópartíinu í gær.
Takk fyrir skemmtunina, allir þar.

Ekkjað neeeennessu!

Ég er svo þreytt/slöpp/löt.

Á að fara í partí í kvöld en er ekki að byrja að nenna á skipuleggja það. Á gólfinu situr Freigátan og rífur bók í tætlur á milli þess sem hún rífur geisladiska úr hlustrum. (Faðir hennar er að reyna að segja henni að skammast sín, en hún syngur bara til baka: "Hah hah HÆÆÆ!" Sem er frumsamið lag sem hún hefur sungið nú um hríð.

Og ég er ekki að nenna að díla við neitt. Rannsóknarskip er að fara á tónleika og ég er að sofna. En það stendur víst uppá mig að koma barnunganum í rúmið í kvöld. Því miður er Smábátur farinn norður. Annars myndi ég senda systkinin út á trampólín, og leggja mig.

Og ég er búin að komast að því hvers vegna Framsóknarflokkurinn græðir alltaf öll þessi atkvæði á lokasprettinum. Í dag er hann búinn að gefa mér bæði grænan frostpinna og kaffi. Sjálfstæðisflokkurinn er búinn að gefa mér mjólk. (Hollt, en dáldið boríng.) Aðra hef ég ekki séð eða heyrt.

Svo þar er lausnin á því fundin. Það borgar sig að gefa nammi.

Zzzzzzz