Þó ekkert annað komi út úr byltingarbröltinu

Þá hlýtur að vera óhætt að slá þessa öööömurlegu forkeppni í júrívísjón af. Fáránlegt að horfa á hóplinkuna í því samsulli af tónleysi á sama tíma og Íslendingar eru loxins að finna bítið.

Sendum bara sex vaska trommara til Rússó.

VanHæf RíkisStjórn!
Bommsarabommsarabei!

Utanþingsstjórn

Ég er ekki að mótmæla vegna þess að mig langar í holla hreyfingu og útivist. Ég er að mótmæla vegna þess að ég treysti ekki ríkisstjórninni. Ég treysti henni meira að segja svo illa að þó búið sé að kasta fram dagsetningu sem formenn stjórnarflokkanna ætla að ræða um helgina get ég ekki litið svo á að þar með sé búið að boða formlega til kosninga. Þessir tveir formenn hafa undanfarið verið algjörlega úr takti við sína flokka sem og þjóðina alla, hvað svo sem liggur að baki, svo ég þori engu að spá um niðurstöður þeirra viðræðna.

Ég finn mig hallast meira og meira að kostum þess að utanþingsstjórn verði sett fram að kosningum. (Og 9. maí held ég að gefi fólki ágætistíma til að skipuleggja sig. Gömul framboð sem ný. Þó mér finnist 4. apríl flottari kjördagur... en það er nú af persónulegum ástæðum.)

Ég held að hræðsla fólks við utanþingsstjórn byggi á þeim misskilningi að þingmennska undirbúi menn fyrir ráðherraembætti. (Í því held ég allavega að minn misskilningur hafi legið.) En nú er ég farin að hallast að því að þingseta og pólitíkurþref almennt undirbúi menn fyrst og fremst í því að þekkja flokksgæðingana frá almúganum og vita hverjum skuli hygla. Ég held að við þurfum ríkisstjórn skipaða fagmönnum sem hvorki hefur að að leiðarljósi að moka yfir mistök undanfarinna ára né klekkja á pólitískum andstæðingum með þeim. Menn geta mokað og klekkt niðri á þingi, alveg eins og þeim sýnist, en í ráðuneytunum þarf að vinna öflugt hreinsunar- og uppbyggingarstarf sem má síst felast í því að méla niður restina af velferðarkerfinu.

Þeir sem gagnrýna þessar hugmyndir vilja meina að aðrir en sitjandi ráðherrar séu ekki nógu vel "inni í málunum." Mér hefur nú ekki sýnst sitjandi ráðherrar vita neitt í sinn haus, margir hverjir. Að Jóhönnu Sigurðardóttur undanskilinni. Og "málum" er mörgum hverjum haldið svo rækilega leyndum fyrir þjóðinni að maður spyr sig, oft á dag, hvers vegna þau þoli ekki dagsins ljós. Hinar þokukenndu "björgunaraðgerðir", sem ekki sjást í þjóðfélaginu, fremstar í flokki.

En við þurfum líka fullskipað þing. Þingmenn sem sitja þingfundi og vinna í þingnefndum. Ráðherrar þurfa á sama tíma að vinna fulla vinnudaga í sínum ráðuneytum. Ef þeir eru að gera gloríur eiga þær að stoppa í þinginu. Ekki afgreiðast blindandi vegna þess að viðkomandi ráðherra er í sama flokki og Pétur en ekki Páll.

Þess vegna verður appelsínuguli gallinn dreginn upp í dag og hávær búsáhöld til að stompa með!
RÍKISSTJÓRNIN ER ENNÞÁ BULLANDI VANHÆF!
Austurvöllur kl. 15.00

Veikindi og spuni

Ég óska forsætisráðherra góðs bata.

En.

Tilkynnti utanríkisráðherra veikindi sín í beinni?
Eða fyrrverandi forsætisráðherra, þegar hann fékk krabbamein í miðju fjölmiðlafrumvarpi?

Þessi spunatilraun pirrar mig.

Staðreyndin er sú að formaður Sjálfstæðisflokksins verður frá vegna veikinda frá mánaðamótum og eitthvað áfram. Læknar eru bjartsýnir á að hann nái fullum bata. Svona veikindi ber hins vegar að taka alvarlega og manninum ber augsýnilega að taka sér frí frá störfum. Enda þykir mér afar ósennilegt að menn geti sinnt ábyrgðarstöðu með aðrar eins fréttir á bakinu. Og nú þarf, eins og forsætisráðherra hefur sjálfur margoft sagt, að takast á við mörg, stór og brýn verkefni. Það er jafnvel ámælisvert að hann skuli ekki hafa vikið strax og hann fékk þessar fréttir en vonandi er því um að kenna að hann hafi ekki hugsað skýrt. Vonandi var ekki ætlunin að nota þessar fréttir til að reyna að slá á óánægju í samfélaginu með því að vorkunnarblanda hana sektarkennd almúgans yfir að hafa veist að veikum manni.

Varaformaður Sjálfstæðisflokks tekur þá væntanlega við stjórnartaumum í flokknum og fær vonandi meiri frið til þess heldur en varaformaður Samfylkingarinnar.

Við skulum ekki persónugera vandann. Vandinn minnkar ekki við að persónur fari í veikindafrí.

Athugum að ríkisstjórnin er ekki farin frá.
Athugum að ekki er búið að boða formlega til kosninga.

Fréttirnar slá vafalaust á hina persónulegu heift í garð forsætisráðherra sem áberandi hefur verið í mótmælunum. En kröfurnar standa því enn hefur ekkert breyst í stjórn landsins, nema tímabundið og í forföllum.

Látum ekki slá ryki í augu byltingarinnar.

---

Ojújú. Nú berast þær fréttir að Geir Hilmar Haarde ætlar sér að sitja sem forsætisráðherra til vors. Og vefheimar eru að missa sig af meðaumkvun og fólk talar um að hætta að mótmæla. Ég horfi og horfi og sé ekki hvernig hann er orðinn minna vanhæfur nú en fyrir tveimur tímum síðan.

Ég óska spunameisturum Sjálfstæðistflokksins til hamingju með þennan áfangasigur.

En vona að þjóðin verði búin að ná áttum eftir þessa reyksprengju á morgun og mæti á Austurvöll.

Verkefnum?

Ríkisstjórnin vill starfa áfram fram á vor. Allavega kærustuparið sem stendur fyrir henni. Þau vilja fá að "starfa að verkefnum." Það væri nú svona fjórtán sinnum trúverðugra ef menn væru til í að segja frá því hver þessi "verkefni" eru. Bara einfalt: "Við þurfum að gera þetta og þetta og þetta." Sú staðreynd að útskýringar á því í hverju þessi "verkefni" felast segja mér að þetta sé eitthvað sem aðrir geta gert og betur. Hugsanlega eru þetta einhver skilyrði frá IMF, sem sauðsvartur almúginn má, bæðevei, ekki vita hver eru.

Eitt og annað segir mér að þau viti ekkert hvað þau eru, eða eiga að gera.
Til dæmis:
- Niðurskurður í heilbrigðiskerfinu.
- Frysting lána rennur út um næstu mánaðamót.
- Blaður um úrræði fyrir heimili - ekkert gerist samt fyrr en eftir að menn eru farnir á hausinn.
- Blaður um viðbrögð við atvinnuleysi - ekkert gerist nema niðurskurður leiðir til uppsagna hjá hinu opinbera.
- IMF lánið. Ég vil vita hvað hangir á spýtunni. Nákvæmlega. Ég vil fá að lesa samninginn og líka smáa letrið og láta þýða fyrir mig það ósagða.
- Nú vil ég fara að láta leita að sökudólgum. Rannsaka bankamisferlin fyrir alvöru og sækja menn til saka. Dómsmálaráðunleytið á að gera það og ætti að vera búið að því. Í staðinn hafa pappírstætararnir fengið að ganga í 100 daga. Allir sem voru yfir eftirlitsstofnunum á meðan glæpirnir voru framdir eru að sjálfsögðu bullandi vanhæfir. Og ríkisstjórnin er búin að sýna og sanna að hún er vanhæf til að gera nokkuð í því.

Það er risastóra vandamálið.

Svo vill formaður annars flokksins ganga til kosninga í vor en ekki hins. Bendir ekki til þess að mikið sé eftir af þessu samstarfi.

Annars finnst mér gott að það virðist vera almennur skilningur á því að skrílslæti örfárra einstaklinga í nótt áttu ekkert skylt við mótmælin. Ekki aktívista, ekki anarkista, engan sem er að reyna að tjá skoðun sína á ástandinu í þjóðfélaginu. Næst þegar ég fer niðreftir ætla ég í gamla snjósleðagallanum mínum. Það gerist ekki appelsínugulara en það. Og snjallt að fresta mótmælum á föstudags- og laugardagskvöld. Enda mikilvægast að hafa hátt á fundatíma Alþingis, hér eftir.

Þessi ríkisstjórn má umfram allt ekki hafa vinnufrið fyrr en búið er að slíta stjórnarsamstarfinu og dagsetja kosningar. Og ekkert kjaftæði um að "kjósa á árinu" eða "kannski í haust" er að fara að friða neinn.

DAGSETNINGU Á KOSNINGAR Í VOR!!!

Stjórnarkreppa?

Ég hélt þetta væri að koma í gær. Og fram eftir degi. Nú hefur Formaðurinn náð í skottið á Össuri og hann virðist hafa smitast af misskilningi hr. Haarde að stjórnarslit þýði stjórnarkreppu.

Stjórnarkreppa (skv. snara.is) erfiðleikar á að mynda ríkisstjórn eða við að halda henni saman

Ég myndi segja að hin ógurlega stjórnarkreppa væri þegar komin. Stjórnin getur ómögulega haldið sér saman.

Og ég sé ekki vandamálið við að stofna næstu ríkisstjórn. Sem starfar fram að kosningum í vor. Það er meira að segja eiginlega búið að setja hana saman. Bara formsatriði að handabanda það.

Ég sé ekki aðra stjórnarkreppu en þá sem nú ríkir.

Appelsínugulur!

Vissi að það ætti eftir að koma sér vel að hafa ekki skipt um haus á blogginu mínu.
Finnst samt pínu óheppilegt að nota akkúrat Samfylkingarlitinn sem kennilit.

En hvað um það? Appelsínugulur! Friðsamleg mótmæli!

Og ekki rugla saman djammi og mótmælum um helgina.

Mótmæla reiður.
Djamma glaður.

Hávaðabyltingin!

Ég var hrikalega stolt af framgöngu mótmælenda... fram undir miðnætti. Ofbeldi gegn lögreglu verður aldrei annað en vatn á myllu "valdstjórnarinar" hans Björns Bjarnasonar. Hin friðsamlegu en háværu mótmæli sem hafa verið í hávegum höfð eru hins vegar að skila árangri, eins og sjá má af niðurstöðu fundar Reykjavíkurdeildar Samfylkingarinnar í gærkvöldi.

Þess vegna mega friðsamir mótmælendur alls ekki sniðganga mótmælinn vegna einhverra örfárra ofbeldisseggja, báðumegin lögregluskjaldanna. Ég mæli með því að friðsamir mótmælendur stilli sér upp sem næst lögreglu og leggi sig fram um að sýna henni tillitssemi.

En klukkan hálf ellefu þarf að hafa HÁTT!!! Geir Hilmar með skýrslu um efnahagsmál?
Hvað þykist hann hafa að segja sem við vitum ekki fyrir?
Að það sé algjörlega nauðsynlegt að klára að brytja heilbrigðiskerfið í smátt áður en farið verður að skoða bankana almennilega?

VANHÆF RÍKISSTJÓRN!

Hneisa

Ömmubarn framtíðar*: Amma? Hvað settuð þið afi á byltingarbálin í Janúarbyltingunni 2009?
Sigga amma: Ekkert, elskan. Við Árni afi vorum með flensu.

Helvítis fokking fokk.

*Ömmubarn framtíðarinnar hefur sjúklegan áhuga á Íslandssögu. Á enda ekki önnur leikföng en nokkra leggi og eina skel og eitthvað hálfónýtt drasl sem lifði af illa meðferð foreldranna og hefur verið að lesa nokkur blöð af bloggi sem voru prentuð út áður en Íslendingar hættu að hafa efni á að framleiða rafmagn og fóru alfarið að reiða sig á elda mótmælanna um ljósmeti.

Róleg...

Stundum er ég orðin alveg sæmilega róleg.

Þá kemur Sturla eða Geir í sjónvarpinu og mig langar til að berja svo það glymji í!

Andskotinn!

Eins gott að varaformaður og co. noti tækifærið og slíti stjórnarsamstarfinu meðan Ingibjörg "þið-eruð-ekki-þjóðin" Sólrún (Haarde), verðandi varaformaður Sjálfstæðisflokksins, er forfölluð.

Ég vil fá kosningar í afmælisgjöf!

LIFI BYLTINGIN!!!

Þingfundi aflýst í dag

Eru menn að sjá að sér... eða fela sig?

Það verður kannski þögn innandyra. En tæpast úti.

Að berja fólk til að verja... hús?

Reyndar er ég nokkuð viss um að byltingin vinnist heldur með hávaða en brotnum rúðum. En ekki þykja mér merkileg rök fyrir ofbeldi gegn almennum borgurum sem hljóða uppá að það þurfi að "verja Alþingishúsið". Enginn reyndi að ráðast til inngöngu. Enginn sótti fram gegn neinu nema dauðum hlutum. Er ekki komið örlítið ójafnvægi á hlutina þegar má meiða fólk til að varna því að það meiði... hús?

Óhreinkun á þessu ágæta húsi er táknræn aðgerð um það sem fólki sýnist þegar hafa gerst. Og þó allar rúður í Alþingishúsinu fari í mél, þykjast þeir sem þar sitja inni hafa efni á að hnýta í aðra fyrir að eyða almannafé?

Svo mæli ég með því að menn hafi með sér slökkvitæki. Ekki til að slökkva neina byltingarelda, heldur vegna þess að sé slegið í slökkvitæki glymur óskaplega fallega í þeim. Ekki ólíkt kirkjuklukkum.

En svo eru það þeir sem vilja vita fyrirfram hvað menn vilja fá út úr kosningum... (Sem er annars undarleg krafa, meira að segja í meðalári.)
- Ef ekkert annað, kjörna fulltrúa sem endurspeglar vilja landsmanna.
- Það hefur væntanlega í för með sér að trú erlendra ríkja á íslenskum stjórnvöldum eflist aftur og gerir hægara um vik að stunda milliríkjaviðskipti og fá erlend lán á sæmilegum kjörum. (Til að geta borgað upp í snarhasti fasistalánið sem sitjandi ríkisstjórn tók með skilyrðum sem við höfum enn ekki fengið að vita.)

En við verðum að fá dagsetningu á kosningar sem fyrst. Til þess að fólk geti farið að skipa sér í fylkingar og vinna viðamestu hugmyndavinnu sem farið hefur fram í sögu lýðveldisins. Og sitjandi ríkisstjórn hefur sýnt af sér þvílíkt vanhæfi að það má ekki gefa henni vinnufrið til að klúðra málum frekar.

ÁFRAM MEÐ BYLTINGUNA!

ÞIÐ!?!?!?

Þorgerður Katrín segir á mbl.is, því til stuðnings að ríkisstjórnin þurfi að sitja áfram og að ekki sé tímabært að boða til kosninga:

"Við verðum að taka afdrifaríkar ákvarðanir, bæði í utanríkis-, peninga- og efnahagsmálum þjóðarinnar.“ [Leturbreyting mín]

ÞIÐ!?!?!?!
Verðið þið sem settuð okkur á hausinn og komuð okkur út úr húsi hjá öllum þjóðum með viti, að fá frið til að taka afdrifaríkar ákvarðanir í efnahags- og utanríkismálum? Þið? Skiljið þið virkilega ekki að þið ráðið ekkert við það verkefni? Hverjir eru búnir að klúðra málunum með fádæma lélegri ákvarðanatöku í áðurnefndum málum?
Þið! FOKKÍNG ÞIÐ!

Ég er skíthrædd við allar ákvarðanir sem flest þess fólks sem fer með stjórnina á þessu landi er að taka. Það þarf að koma þeim frá völdum. Áður en holan verður mikið dýpri. Ég vona að byltingin sé byrjuð. Merkilega margir niðri á Austurvelli miðað við að helmingur þjóðarinnar liggur í flensu.

Svo er afmæli Láru ömmu og Obama tók við í dag.
Til hamingju með það, allavega.

Um hest

Þegar maður er hroðalega lasinn, kreppa úti og allt á heljarþröminni
er fínt að hlusta bara á fallegt lag um hest.

Snilldargrjót

Endurstaðsetti einn Guðmund Erlinx í Vesturbænum í gær og fór í leikhús til Hafnarfjarðar um kvöldið. Eitthvað hefur þetta ekki þóknast Alheiminum þar sem ég ligg algjörlega óvíg af kvefdrullu í dag.

Allavega.
Steinar í djúpinu.
Lab (tilraunastofan) Loki.
Sýnt í Hafnarfjarðarleikhúsinu.
Lítið þorp. Nokkrar sögur. Byggt á allt öðrum bókmenntum.
Nema. Ekki vottur af Sumarljósheilkenni.
Ég leit aldrei á klukkuna. Horfði ekkert upp í loftið. Missti aldrei áhugann. Og auðvitað gleðst maður og þjáist með Ólafi Darra. Miklu meira rannsóknarefni hvernig hægt er að klúðra því.
Fegurðin skein í gegnum snilldarvinnu með ljótleikann. Textasamsullið og meðferðin öll var hreinræktuð snilld.
Ég sá ekki tilganginn með hænunni og skildi ekki endinn... eða eftirmálann... Þ.e.a.s. mér fannst endirinn vera fyrr. Að öðru leyti var ég einstaklega hamingjusöm.

Og fékk hugljómun um eina pólinn í hæðina sem ég get mögulega tekið í leikritun um hrunið/ástandið/byltinguna.

En varir mínar eru síld.

Lab Loki sýnir allra síðustu sýningu af Steinar í djúpinu í Hafnarfjarðarleikhúsinu 25. janúar.
Mæli skýlaust með.