N1 og Byr?

Jæja. Hrun 2.

Endar kannski bara með því að svíðingar og fjárglæframenn eiga bara engin fyrirtæki eftir?

Það væri nú ekki amalegt...

Komin með þetta! Byltinging lifi!

Alþingi er óstarfhæft, eins og það er skipað.
Eftir niðurstöður Rannsóknarskýrslu Alþingis þurfa allir að víkja sem:

1. Eru skuldugir við bankana og/eða samfélagið upp á meira en ca. 50 milljónir, í gegnum sjálfa sig, fyrirtæki sína, maka eða nánustu fjölskyldu. Fólki sem er í svo miklum persónulegum fjárhagsvanda er ekki treystandi til að taka hag almennings fram yfir eigin (eða fjölskyldu sinnar) í mikilvægum ákvörðunum sem löggjafarvaldið stendur nú frammi fyrir.

2. Sitja á Alþingi eftir að hafa þegið háa styrki frá stórfyrirtækjum í kosningabaráttu sína. Það að menn sitji á Alþingi sem fulltrúar almennings en ekki stórfyrirtækja verður að vera hafið yfir allan vafa.

3. Hafa setið í ríkisstjórnum undanfarinna 10 ára, eða svo, og/eða komu að einkavæðingu bankanna. Sama í hvaða flokki þeir voru þá, eru nú, eða ætla að vera í framtíðinni.

4. Eiga hagsmuna að gæta í viðskiptalífinu. M.ö.o., Alþingi verður að vera skipað venjulegum launaþrælum EINGÖNGU þegar fyrir liggur það verkefni að koma aftur eðlilegu regluverki á viðskiptalífið. Annars eru menn báðumegin borðsins. Fjárfestar, stjórnarmenn stórfyrirtækja, silfurskeiðalið, burt!

Og þetta er ekkert "tímabundið" og ef varamenn eru undir sömu sök seldir þarf að mjakast niður listana þangað til einhver sæmilega laus við tengsl við hin meira og minna gjaldþrota svikamillur finnst. (Þarf reyndar að fara fáránlega langt niður hjá sumum flokkum.)

Þessi viðmið þurfa að fara í lög, og í framhaldinu þarf að kjósa aftur til Alþingis, og stjórnlagaþings.

En þetta gerist ekki án átaka. Vissulega sjást bálin ekki jafnvel í íslenska sumrinu, en það þarf að fara að trufla störf Alþingis.

Þetta gengur ekkert svona.

1. maí framundan!

Byltingin lifi!

Horfur á flugi...

Nú lítur úr fyrir að Rannsóknarskip fari ekki til Danaveldis í dag. Nema þá að hann sigli.
Að öðru leyti er ég svolítið að fíla þetta.

Í staðinn fyrir að áætlanir séu ferkantaðar og ófrávíkjanlegar og naglfastar, hangi á ofurskipulagningu og hámörkun gróða, í fjárhagslegu sem tímasparnaðarlegu samhengi, er þetta meira svona... já, það eru nokkuð góðar horfur á flugi ... kannski, bara.

Fullt af fólki er annarsstaðar en það ætti að vera. Það skiptir mismiklu máli. En mér finnst það skjóta mjög skökku við í umræðunni þegar menn vilja fljúga, þó svo að flugvélarnar hrapi kannski, vegna þess að þeir séu að tapa svo miklum peningum á að gera það ekki.

Alveg, peningana eða lífin? Allt í lagi að taka sénsinn. Til að tapa ekki peningum.

Fær mig til að hugsa um verkaskiptinguna og framþróunina og hvort við höfum endilega gengið til góðs. Var endilega góð hugmynd að taka mannlífið, njörfa það niður í exelskjöl svo hægt væri að maximæsa proffits fyrir örfáa einstaklinga? Er endilega best að við séum eins og maurar í maurabúi, lifum í klessu á milli klukkunnar og bankareikningsins? Að sumir þurfi að vinna allt of mikið og hafi vart mannréttindi á vinnutíma á meðan fullt af fólki hefur ekkert að gera?
Er þetta virkilega besta sístemið?

Og var ekki tilgangurinn með uppáfindingu verkaskiptingar í mannlegu samfélagi að allir gætu haft það ögn þægilegra? Hvílt sig til skiptis? Var hann sá að örfáir ættu að fá að eiga alheiminn, rorrandi í spikinu og ofneyslu í hvívetna á meðan almúginn þjáðist ýmist af of eða van vinnu, vita bjargráðalaus og alltaf hálfpartinn á horreiminni?

Hvernig væri að þetta væri bara: ... nei, sorrí, flugmaðurinn er sloj og sá sem hefði getað leyst hann af ætlar frekar að heimsækja ömmu sína í dag.
Er ykkur ekki sama þó þið farið bara á morgun?

Stundum langar mig að flytja til kaótískari heimshluta.

Skýrslan og svona...

Skýrslan kom í hús hjá mér í dag. Ég er eitthvað ekki að nenna að byrja á henni. Mér heyrist nefnilega hinir nýendureinkavæddu bankar standa á jafnvel lélegri brauðfótum en þeir gömlu, auk þess sem raddir heyrast um yfirvofandi gjaldþrot Íbúðalánasjóðs, Sparisjóðanna, Lífeyrissjóðanna ... og bara þess sem eftir er? Enda eru þetta mest sömu asnarnir sem eru enn að reka þetta. Og þeir ætla sér ekkert annað en fyrir tveimur árum; nefnilega hirða allt fémætt innanúr og skilja skurnina eftir, þangað til hún hrynur. Á eftir hinu.

Jæjajæja. Þá verður kannski hægt að gera aðra byltingu. Og stofna Zeitgeist-þjóðfélagið. Enda ekki um annað að ræða en að segja formlega skilið við peningakerfið á því stigi málsins.
Og það verður nú fínt.

Eiginmaðurinn sveiflast á milli vonar og ótta. Átti að vera að fara á ráðstefnu í Danmörku á morgun en flugið er allt í öskunni. Sjáum til. Verstur fjandinn að ef hann kemst ekki þá verð ég illa bitin í samviskunni í þau þrjú skipti sem ég hugsa mér að vera í burtu í sumar!

Úr góðufréttahorninu er það helst að frétta að Hraðbátur hefur formlega fengið inni á leikskólanum hinumegin við götuna og fær að byrja þar um miðjan maí. Ekki nóg með að þá getum við sparað okkur akstur í vinnuna, heldur lækkar dagvistunarkostnaður heimilisins um einhvern tuttuguþúsund kall á mánuði.
Og munar um minna á þessu heimili einna grunnskólakennaralauna.

Annars er ferlega margt að klárast, bara. Kennsla búin í Háskólanum. Voða mikil heimsendatilfinning í loftinu.

Kannski bara askan og eldurinn.

Endurmat

Mér finnst alltaf jafnfyndið að fara allar krókaleiðirnar sem þarf til að komast inn í heimabankann minn, póst-hrun. Notendanafn og lykilorð, þá á að brúka eitthvað auðkennisdæmi sem ég setti óvart í þvottavélina fyrir mörgum árum og þarf þess vegna að fá sent í símann... kostar 6 krónur ... hvað ætli bankar og símafyrirtæki hali mikið inn á þessu á dag?

Allavega, það sem mér finnst fyndið við þetta alltsaman er að nú er komið í ljós að bankarnir voru rændir innanfrá. Og á meðan bankaleynd og skilanefndir sitja á þeim, og við fáum ekki að vita hverjir eiga þá, er líklega ennþá verið að því. Líklega endar með því að fólk fer bara að geyma peningana heima hjá sér. Fasteigna"markaðurinn" er heldur ekki "í frosti". Það er bara ekki skortur á húsnæði. Enginn er að fara að borga tugmilljónir sem hann á ekki til fyrir eitthvað sem miklu meira en nóg er til af. Fasteigna"markaðurinn" er ekki frosinn. Hann er farinn. Sem og íslensku "fjármálamarkaður" eins og hann leggur sig. Og farið hefur fé betra. (Pun intended.)

Margir eru orðnir óþreyjufullir og kalla á einhverskonar "enduruppbyggingu". Ég held að það sé ekkert "endur" í því. Hér þurfa að verða jarðvegsskipti og svo þarf að hefja hér í fyrsta sinn uppbyggingu. Hún er reyndar hafin á fullu. Það er bara lítið horft til þess þar sem enginn einn er að skapa fjögurþúsund vellaunuð skítadjobb. En það er ýmislegt að gerast í atvinnulífinu. Menn eru byrjaðir að fikta sig áfram með að fullvinna matvöru. Það hefur orðið sannkölluð nýsköpunarsprengja. Hönnunarverkefni. Allt brjálað í ferðamennsku og menn hafa loksins tíma til að láta sér detta eitthvað sniðugt í hug til að sýna túristum. Og þar kemur líka hönnun aftur við sögu.

Vandamálið sem margir virðast sjá er að það er ekkert EITT STÓRT að redda ÖLLU. Lesist: Það er ekkert eitt stórt ógeðsver þar sem gullrassar og arðræningjar geta safnað til sín haug af fólki og látið það þræla fyrir sig á skítalaunum á meðan þeir sjálfir maka krókinn.
En só wott?

Atvinnuleysi er vandamál. En ef það væri nú bara farið í að manna, t.d., heilbrigðis og menntakerfi almennilega, í fyrsta sinn í sögu lýðveldisins, væri það ekki lengur vandamál. Hvað með það þó við þurfum að vera aðeins lengur að borga niður síðustu sukkgeðveiki? Er slæmt að við þurfum að muna það lengur en þrjú ár? "Fjármálamarkaðurinn" er farinn. Dauður. Kemur aldrei aftur. Góðærisfábjánarnir verða bara að fara með þýfið í spilavíti erlendis.

Atvinnuleysi er líka viðhorfsvandamál. Atvinnuleysi og iðjuleysi þarf alls ekki að vera eitt og hið sama. En það hjálpar ekki til að sjálfsmynd hins almenna Íslendings (og Vesturlandabúa, reyndar) hangir gríðarlega mikið á því að honum hlotnist sá heiður að vera launaþræll hjá arðræningja. Þeir sem fást við aðra (og næstum alltaf merkilegri) hluti hafa aðra og ómerkilegri stöðu í samfélaginu. Þetta viðhorf auðveldar mönnum vissulega verkið, þegar þeir ætla að ryksuga allt fémætt úr þjóðfélaginu.

Mér líður ágætlega eftir þessa skýrslu. Er reyndar enn með smá ælubragð eftir PR-stönt morgunsins frá Björgólfi T Hor... ferlega vona ég að allir þessir bjánar séu í útlöndum.

Sumir hafa talað um að kosningar hafi verið of snemma. Þær ættu að vera núna. Ég fór að ímynda mér hvernig ástandið hérna væri núna ef Geir og Solla og co. væru enn í ríkisstjórn. Ég hef á tilfinningunni að menn væru ekkert að fara að segja af sér núna heldur. Og það væri ekkert bara verið að tromma og henda einu og einu eggi í rólegheitunum niðri á Austurvelli. Ef byltingin væri núna væri þegar orðið mannfall. Svo líklegra er heppilegra, svona uppá ofbeldið, að flest af þessu fólki sé að mestu horfið af sjónarsviðinu.

George Simmel er þýskur spekingur sem setti fram áhugaverða kenningu snemma á 20. öld. Hún snýst um að á hverjum tíma, á ákveðnu svæði, verði stundum ein hugmynd eða fyrirbæri algjörlega allsráðandi. Sé grunnstoðin að öllu samfélaginu að menn komist hreinlega aldrei út úr henni, þrátti fyrir að þeir sjái gallana. Svoleiðis var Guð á miðöldum í Evrópu. Enginn gat hugsað út fyrir vilja Guðs og vald kirkjunnar. Þegar Marteinn Lúter gerði sína byltingu datt honum ekkert í hug annað en að breyta kirkjunni. Komst ekki út fyrir Guð. Hann var miðlægur í öllum átökum, allri stéttaskiptingu, öllum ójöfnuði, stríði, galdraofsóknum, öllum viðbjóðnum sem viðgekkst. Auðvitað kom svo í ljós að þessi miðlæga hugmynd var ekki annað en skálkaskjól. Þeir sem töglin höfðu og hagldirnar voru þeir einu sem brutu lögmál Guðs eins og þeim hentaði (og gera enn) en þrautpíndu almenning til að fylgja ritningunni, hvað sem það kostaði. Framþróun í vísindum og þekkingu var líka stöðvuð, að miklu leyti. Það sem samsamaðist ekki ritningunni mátti ekki rannsaka.
Svo komu menn til sjálfra sín. Og þá kom Endurreisnin.

Í dag eru það peningar. Öll stríð. Öll mengun. Allur fáránleikinn í umgengni okkar við annað fólk og náttúruna viðgengst þar sem tilgangurinn helgar meðalið. Tilgangurinn er peningar. Og þeir sem hafa alræðisvald yfir peningunum geta látið skuldirnar sínar hverfa. Rænt eina þjóð, stungið undan óteljandi milljörðum, en gengið samt um með tandurhreinar kennitölur eins og nýfædd lömb. Skríllinn verður samt að borga skuldirnar sínar. Borga skatta og borga fyrir alla þjónustu, stóra og smáa. Þannig er lögmálið. Og það er ekki hægt að rannsaka hvað liggur handan veldis peninganna. Það fæst ekki fjármagn til þess.

Það verður gaman þegar veldi peninganna hrynur. Og það gerir það. Sprungurnar eru orðnar mjög áberandi. Þá sitja þeir sem töldu sig á toppnum allt í einu uppi með haug af pappír. Og ekkert að éta.

Þá skal maður nú glóta, ef maður verður ekki dauður.

---

Svo gýs bara meira og skelfur landshorna á milli.
Kannski miðaldamenn hafi haft rétt fyrir sér og Skrattinn sé á leiðinni upp að innheimta sálirnar sem hann keypti?

Hugleikur í Þjóðleikhúskjallaranum!

Ég missti af skýrslusullinu í kvöld.

Ástæðan er hreint ekki af verra taginu. Hugleikur gerði obbolítið kommbakk í Þjóðleikhúskjallarann og sýndi eina 7 einþáttunga fyrir fáa útvalda. Vilji fleiri verða útvaldir er önnur sýning annað kvöld kl. 20.00. 1500 kall inn. (Sem er ekki NEITT miðað við allar tölurnar sem við höfum heyrt í dag. Ekki taka myntkörfulán fyrir því, samt.)

Og þetta er nú bara nokkuð flott dagskrá hjá okkur, held ég bara, svei mér þá. Örugglega mjög hressandi eftir sólarhring af skýrsli.

Annars sýnist mér þetta 9 binda rittröll vera hið besta og vonandi að sérstakur saksóknari og þingnefndin taki á málum af sömu festu.

Að vísu skammast sín enginn.
En bjóst nokkur við því?

Menn verða þá bara ferlega bitrir þegar þeim verður stungið í steininn, við heilmikinn fögnuð allra viðstaddra. Það verður bara fyndið.

42 mínútur í skýrslu! Darrammmm!!!

Heyrði talað um stemmingu á fréttastofunni á Bylgjunni í morgun. Enda er svona kjördagsfílíngur í manni.

Ég er alls ekki að fatta hræðsluna við óeirðir. Ekkert frekar en ég fattaði hana fyrir hálfu ári síðan. Ef þessi skýrsla vekur þá skoðun manna að gagngerra breytinga sé þörf í stjórnmálum á Íslandi er það ekkert nema illa frábært. Og ég held það sé ekkert verra að sjá nokkra táknræna gjörninga á torgum og við heimili ákveðinna einstaklinga af því tilefni. Og jafnvel trommað smá.

En byltingin er löngu orðin appelsínugul og ég held hún verði það áfram.

Svo á Davíð eftir að koma og segja að þessi skýrsla sé ómerkilegur pappír og segi ekkert nýtt... soldið eins og með endurreisntarskýrslu Sjálfstæðisflokksins.

Og það er bara eitt sem ég þoli verr en þegar við Davíð erum sammála. Það er þegar við Hannes Hólmsteinn erum sammála. Hvort tveggja gerist stöku sinnum... og þá fer veröld mín einhvernveginn á hliðina.

Byltingin lifi!