Mjög alvarleg leti í gangi. Nenni alls ekki að leggja hönd á plóg, sem er nákvæmilega það sem ég ætti að vera að gera, forverja hundrað ára gamlan plóg niðri á verkstæði.
Fór allt í einu að huxa um verslunarmannahelgina, vegna einhvers útihátíðaáreitis í útvarpi. Langar að gera eitthvað... held ég... Einhverjar hugmyndir?
Álfaborgarsjens á Borgarfirði Eystri er heitur.

Brjáluð blíða!
Systur mínar elskulegar mættar á svæðið. Er hins vegar sjálf flutt að heiman, er að gæta húss og hunds útí bæ í hálfan mánuð. (Það er hópur af ca. 2 ára börnum á safninu. Þau eru eins og kindur! Náði einum á hraðri leið út á götu.)
L.ung.a. (Listahátíð ungs fólks á Austurlandi) um helgina. Okkur Báru langar á stompnámskeið, en ég er trúlega of gömul til að mega fara :-( (Efast um að ég geti logið mig niður fyrir 25... einhverra hluta vegna.)
Verð í fríi um helgina, enda á að vera komin rigning. Vei.
Harry Potter 5 er mættur á svæðið, en Bára er ennþá að lesa hann. Þetta er allt að koma.

Gott partý á Lagarfljótsorminum í gær.
Reyndist vera 10 ára afmælishátíð hins fornfræga tríós "Austurlands að Glettingi". Þetta var mikil snilld. Partý sem enginn gat farið úr! Þetta gaf mér hugmynd að, annars vegar þrítugsafmælinu mínu og hins vegar afmælisleikriti fyrir fertugsafmæli Leikfélax Fljótsdalshéraðs. (Vinnuheiti: Ferð án fyrirheits.) Mér fannst mikil upplifun að djamma á fljótinu. Frábært að þetta skuli vera hægt!
Ísland! Best í heimi!
Svo hitti ég FULLT af fólki sem ég hef ekki séð lengi. M.a. Öndru, skólasystur mína úr menntaskóla, en hún er búin með nám í þróun tungumálatengdrar gerfigreindar og búin að fara í spænskunám til Guatemala, svo eitthvað sé nefnt.
Það er margt skrítið í kýrhausnum.

Það eru álög á vinnuhelgum mínum þetta sumarið. Fyrir hálfum mánuði var ég að vinna. Þá var jazzhátíð, fullt hús af gestum, útihátíð í stofunni og gargandi blíða úti.
Um síðustu helgi var ég ekki að vinna. Þá var fýlulegt veður og ekkert að gerast í menningar- eða félagslífi.
Um þessa helgi er ég að vinna, og eins og við manninn mælt, Snorri Hergill á svæðinu (var reyndar gróflega misnotaður sem afsökun fyrir fyllerýi í gær, þar sem hann sjálfur var lasinn og komst ekki með), partý á Lagarfljótsorminum í kvöld og sólin skín, þvert ofan í fúlar veðurspár. Það lítur út fyrir að safngestir verði bara að lifa við það að safnvörður hér verði meira og minna fullur/þunnur/geðvondur aðra hverja helgi í sumar.
Annars var uppistandið hans Snorra hreinasta gargandi snilld í gær, eins og við var að búast. Það mættu reyndar alveg skítlega fáir, en eftirá að hyggja þá er mér bara alveg hjartanlega sama, enda fékk ég manninn hingað aðallega til að skemmta mér. Það gerði hann svikalaust, það er langt síðan ég hef hlegið svo mikið að ég fékk harðsperrur í þindina. Þeir sem af misstu, ja, þeir misstu bara af, og eru óhamingjusamari en þeir vita af fyrir vikið.
Ókei. Best að fara að reyna að láta renna af sér yfir ísfólkinu.

Helberasta lygi allra tíma:
"Á sumrin er ALLTAF gott veður fyrir Austan!"

Var rétt í þessu rétt orðin úti á leiðinni neðan úr Kaupfélagi og langaði (eins og svo oft oft oft áður) að öskra út í slagviðrið:
"JÁ EN ÞAÐ ER FOKKÍNG JÚLÍ!!!"

Allavega, ýmislegt er hægt að gera sér til skemmtunar þó úti sé veður vott og allt í klessu. Ég var búin að lofa nánari upplýsingum um Sauðkindina hann Snorra.

Næstfyndnasti maður Íslands verður sumsé með uppistand á
Cafe Nielsen,
annað kvöld (föstudag 11. júlí) klukkan 21.00 og miðaverð er kr. 500.-

Allir að mæta sem vettlingi (og regnkápu) geta valdið!

Neinei, bull og vitleysa.
Snorri Hergill og Sauðkindin eru búin að vera svaka dugleg og plögga sig sjálf útum allt. Mér skilst að Vaðbrekkuættin ætli að mæta, og þá erum við nú bara nokkuð góð með okkur.
Nú liggur bara fyrir að finna út hvar blessuð plakötin hafa endað í heiminum.
Semsagt, fyrir þá sem eru að leita að menningu/skemmtun hérnamegin á landinu á föstudagskvöldið:

SNORRI HERGILL OG FÉLAGAR
verða með uppistandið
SAUÐKINDIN
á Cafe Nielsen

Nánar auglýst um leið og ég er búin að sjá hvað stendur á þessum ágætu veggspjöldum.

Afsakið fjarveru mína allir góðir hálsar, er búin að liggja óvíg eftir að mínir elskulegu foreldrar færðu mér sem minjagrip frá Skotlandi þessa líka haldgóðu flensu, sem greinilega er kominn beint frá Satni sjálfum. Hér ætlaði ég að vera að róta upp menningarviðburðum, hægri, vinstri og beint, (handa Sævari) en lítið orðið úr sökum eymingjaháttar og óráðs. Ekkert hefur heldur bólað á plaggötum frá Snorra nokkrum Hergli sem ætlaði að vera með sitt ágæta uppistand "Sauðkindina" hér um helgina, þannig að huxanlega fresta ég honum fram yfir útferð hans sem ku standa fyrir dyrum.
Semsagt, alltívolli.