Haarde og Wee Bay

Í sjónvarpsþáttunum The Wire er fylgst með afar vel skipulögðum glæpasamtökum og löggunum sem eru að reyna að hanka forsprakkarana í þeim. Það er nú samt þrautin þyngri. Glæpónarnir eru með góðan lögfræðing á sínum snærum sem getur látið næstum hvað sem er hverfa sporlaust. Vitni, sönnunargögn, jú neim itt. Og líkin hrönnuðust upp og fóru í pirrurnar á löggunum þar sem statistíkin hjá þeim gekk öll út á leyst morð vs. óleyst og það var alveg ömurlegt fyrir þá að sitja uppi með haug af morðum vissu alveg hver framdi, en vitni og sönnunargögn hurfu einhvern veginn alltaf eins og dögg fyrir sólu.

Einu sinni náðist nú samt hann Wee Bay. Ekkert sérstaklega hátt settur í genginu en samt nokkuð afkastamikill í ofbeldinu. Einhvern veginn þannig að það var ekki hægt að skola af honum. Og þá brugðu glæpónarnir á snjallt ráð. Wee Bay játaði á sig öll morð sem búið var að rekja til litlu mafíunnar. Át þau öll, eins og það var kallað. Þar með voru þau úr sögunni og hann fór, einn sinna manna, í fangelsi. Löngu seinna kom fram að eiginkona hans og sonur lifðu mjög þægilegu lífi upp frá því.

Það er ekki alveg laust við að manni detti þessi leikflétta í hug nú þegar reynt var að láta Geir hverfa af sviðinu með öll óþægilegu mútumálin í Sjálfstæðisflokknum á bakinu. Hefði kannski verið ástæða til að fylgjast með bankareikningunum hans næstu árin? Ja, ef plottið hefði virkað.
En íslenskur almannarómur er e.t.v. ekki jafn auðblekktur og uppdiktuð versjón af ammrísku réttarkerfi. Þó honum Geir sé ekkert að svelgjast á "ábyrgðinni" eru ekki einu sinni sjálfstæðismenn sjálfir að gleypa að hann beri hana einn. Nú held ég að hafrarnir séu að greinast frá sauðunum innan þeirra raða og kellingarnar og ýmsir aðrir eru að standa sig afbragðsvel.

Sjálfstæðisflokkurinn á sér alveg viðreisnar von. En fyrst verður hann að átta sig á því að gamaldags íhald er vænlegra til vinsælda í framtíðinni.
Ekki harðlínufjálsismi Hannvíðs með spillingunni og mútunum.

Ef maður á, til dæmis, brúðkaupsafmæli

(sem er reyndar líka afmælisdagur Geirs H. Haarde) er þá ekki algjörlega ásættanlegt að sofa fram að hádegi og hanga svo yfir áðurséðu 6 & the city í fullkominni alheimsleti og nenna hreint ekki að gera neitt í hreinlætisleysi heimilisins eða megruninni sem hófst í gær?

Nei, ætli þetta sé ekki bara geðveikislega vond afsökun.

Best að reyna að nenna að læra eitthvað.

Sjávarspendýr?

Fór í Kringluna í dag. Fékk fjárheimildir uppá tugi þúsunda til að kaupa mér föt í afmælisgjöf þar sem mín höfðu öll... hlaupið. Komst ekki heldur í neitt í Kringlunni. Er þó hreint ekki vön því að versla í mjóstu búðunum. Leit ýmist út fyrir að vera ólétt eða bara almennt feit í öllu sem ég mátaði. Keypti þó eitt og annað, uppá vonina, dreif mig svo heim með hrylling í hjarta, sótti Freigátuna og hjólaði með hana í sund.

Í sundlauginni skemmtum við okkur ljómandi vel. Fram að eftirfarandi samtali:
F: Mamma, við erum hákarlar.
M: Nú?
F: Nei, ég er hafmeyja.
M: Nú, erum við hafmeyjar?
F: Nei, ég er hafmeyja. Þú ert hvalur!

Er hætt að borða. (STRAX eftir þessa pizzu.)

Göngudeild geðsviðs

er svo kallað vegna þess að þangað skyldi ævinlega ganga. Detti manni í hug að ætla að leggja bíl þar fyrir utan er maður geðveikur og af því verður maður enn geðveikari.

En ef maður getur hringsólað með hinum geðsjúklingunum á bílastæðum Landspítalalóðarinnar í þennan hálftíma sem það tekur að ákveða að leggja kolólöglega við gulu línuna, með fullkomnu jafnaðargeði, að sex vikum liðnum, þá hefur maður líklega staðið sig reglulega vel á námskeiðinu í hugrænni atferlismeðferð.

Akkúrat....

...núna var ég að bresta í 35 ára.

Deginum eyddi ég mikið til á leikæfingu. Og svo heima með börnum og eiginmanni sem eldaði handa mér dýrindis nautakjet með innndælis meðlæti. Svo svæfðum við sitthvort barnið, feðgar horfðu á nýjasta Bond og nú erum við búin að reka þann síðasta í rúmið og erum sest fyrir framan annan þáttinn af Crow Road með rauðvínið sem við nenntum ekki að hafa með matnum og After Eight.

Fínasta ammli.

Skemmdarverk á eigum auðmanna

Málningu var skvett á húsið hann Hannesar Smárasonar. Innan við sólarhring seinna var búið að mála yfir hana.

Þetta er greinilega hið besta kreppuráð, samfélaginu til handa.

Atvinnuskapandi og um leið hugsanlega eina leiðin til að ná ránsfeng auðmanna aftur út í atvinnulífið á Íslandi.

HVAÐ SEM ÞAÐ KOSTAR!

Já, menn kalla eftir breytingum. Heimta siðbót og hugarfarsbyltingar NÚNA STRAX!
HVAÐ SEM ÞAÐ KOSTAR!

En hinn vestræni heimur byrjaði að velta á hægri hliðina kringum 1990. Og hefur verið á hægri siglingu til hægri síðan og nú sýnist manni sú stefna vera komin í þrot. Þá byrjar hugsunarhátturinn að velta til vinstri aftur. Hægt og rólega. Ennþá erum við samt gjörsamlega hel-hægra meginn. Nokkrar kosningar eiga eftir að koma og líða. Kreppan á eftir að hafa sinn gang. Holan er stærri en nokkurn er farið að óra fyrir og ástandið lagast ekki árið 2010. Maður þarf ekki nema að kunna ponkulítið að reikna til að sjá það. Það má þakka fyrir ef menn verða komnir nokkurn veginn á lygnan sjó kringum 2030-40 og ekkert mjög margir svelta alveg heilu hungri á milli. Atvinnuleysi og gjaldþrot eru bara pínöts-vandamál, óttast ég, miðað við það sem við eigum eftir að sjá. Og í því hefur ekkert verið hægt að gera síðan snemma árs 2006.

Menn eru ennþá svo fastir í 2007 að þeir fatta það ekki. Bara það að heimta að hugsanaháttur breytist og siðbót verði. NÚNA! Svona heimtufrekja eins og að hlutirnir eigi að gerast NÚNA STRAX og HVAÐ SEM ÞAÐ KOSTAR er ákveðnir minnisvarðar græðgisvæðingarinnar. Þó við séum að tala um frið á jörð, réttlæti öllum til handa og velþóknun meðal mannanna.

En góðir hlutir ku gerast hægt. Slæmir líka.
Sennilega á ýmislegt eftir að breytast. Hvað og hvernig?
Vissulega er gaman að spá.
Og verður spennandi að sjá.

Sjálf er ég að þróa kenningar að menn verði alltaf hálfgeðveikir í aldarbyrjun. Hrokuðu menn ekki líka yfir sig í upphafi þeirrar tuttugustu? Hvernig var þetta ekki með ósökkvanlega skipið Titanic? Og öll heimsyfirráðin og dauðann í heimstyrjöldunum tveimur? Og hrunið 1929 var nú aldeilis búið að eiga aðdraganda.
Er kannski einhver undirmeðvituð númerólógía í kringum þetta alltsaman?

En það sem menn gera hér á Íslandi AKKÚRAT NÚNA held ég að skipti minna máli en margir halda. Það tók áratugi að grafa þessa holu. Og þó Íslendingar hafi verið einna duglegastir þá eru fleiri í henni með okkur. Til dæmis Bandaríkjamenn. Og það mun taka mörg ár að skríða upp úr henni. Og það verður sennilega alveg hunderfitt. Og sennilega eru engar töfralausnir til á því.

Hugarfarsbreytingar, stjórnarfarsbreytingar, siðbætur... sennilega eiga eftir að verða margar og misjafnar. Jafnvel algjör bylting á öllu kerfinu eins og við þekkjum það. Smám saman.
En þetta verður gríðarlega langt langhlaup. Boðhlaup, jafnvel.

Mér finnst jafnvel ekkert pottþétt að ég sjái fyrir endann á afleiðingum þessarar u-beygju sem hinn vestræni heimur er að byrja að taka núna, á meðan ég lifi. Afleiðingarnar á hugsanahátt og siðferði held ég að eigi eftir að verða margvíslegar og margslungnar og "sjálfsagðir hlutir" eiga eftir að taka gríðarlegum breytingum. Sem mér finnst sjást best á því hvað menn telja sjálfsagt í dag. Hvernig er verið að taka á vandamálunum nú með afstöðu og aðferðum alheimsfrekjunnar.

Allt ÞARF að gerast STRAX! og HVAÐ SEM ÞAÐ KOSTAR!
Með sama fítonskrafti og menn sögðu: ÉG ætla að FÁ þessa EINKAÞOTU! HVAÐ SEM HÚN KOSTAR! í hittífyrra.

Árið er enn 2007.