Útvarpið!

Og ég er alveg að gleyma að auglýsa mig. Útvarpsþátturinn sem ég var að gera fyrir áramót, Allt fyrir andann, er á dagskrá Rásar 1 í dag klukkan 15.20. Og verður endurfluttur næsta föstudagskvöld. Svo verður nottla hægt að nálgast hann á ruv.is eitthvað áfram. 

Það er líka frétt um málið á Leiklist.is. Ásamt mjög flírulegri mynd af sjálfri mér með undarlegt hár... sennilega tekin á Húsabakka eða Bandalaxþingi, miðað við vöntun á greiðslu.

---

Heyrði ekki þáttinn minn. Var með eitt barn á brjósti og annað í frekjukasti mestallan tímann. Stóri sjúklingurinn kom aftur af læknavaktinni helmingi veikari, með fulla vasa pensillíns, en er þó ljóslega óvígur um hríð. Hraðbáturinn er með einhverja kveisu og Freigátan er auðvitað með innilokunarkennd og höfnunartilfinningu og gerir allt öfugt. Heimilið er í rúst, Frekjátan er sofnuð, en vaknar annað slagið, sennilega með martraðir frá deginum, Hraðbáturinn sefur í augnablikinu á bringunni á mér (en er reyndar að verða of stór til að ég nái í tölvuna yfir hann) en sefur ekki lengi í einu þessa klukkutímana og alls ekki í rúminu sínu og Rannsóknarskip er í sófanum með brjálaðan hita og hálfskælandi úr hálsbólgu.

Smábáturinn er svo stálheppinn að hafa farið beint úr Vatnaskógarferðinni í útlán til ömmu sinnar og vonandi verður ástandið eitthvað farið að skána þegar hann kemur heim á morgun. Ég er allavega að vonast til að Hraðbátur verði eitthvað sofandi og Rannsóknarskip verði skárra þannig að ég geti skilið þá eftir og viðrað okkur Freigátu eitthvað.