Bjór, meiri bjór!

Það hefur verið hálfgerður hundur í mér síðan ég kom aftur úr sveitinni. Ég er með kvíðaröskun yfir því að hafa margt að gera, sem er svosem ekkert slæmt í sjálfu sér. En flest verkefnanna sem fyrir liggja þykja mér frekar leiðinleg.

En brúnin hefur nú smá verið að léttast, eftir því sem leiðindunum lýkur einu af öðrum. Og hún flaug alla leið upp, eins og rúllugardína, rétt í þessu þegar ég fann uppáhalds Ljótuhálfvitalagið mitt á veraldarvefnum.

Nú ætla ég að hlusta á það nógu oft til að ég geti farið að hafa það á heilanum af einhverju viti.

Bingó!

Það er svo asnalegt, að þegar maður liggur í öllum fjölmiðlum að reyna að grenja út einhvers konar kynningu á leikritinu sem félagið manns er að setja upp, þá gleymir maður iðulega að maður á sinn eigin fjölmiðil. Nefnilega bloggið sitt, sem fær heimsóknir frá yfir 100 ip-tölum á dag. Hundrað eru einmitt tvær fullar sýningar í Hjáleigunni í Kópavoginum þar sem Hugleikur og Leikfélag Kópavogs frumsýna leikritið Bingó á laugardaginn næstkomandi.

Þetta er alveg hrrrroðalega kúl sýning.
Höfundur Hrefna Friðriksdóttir.
Leikstjóri Ágústa Skúladóttir.
Það, eitt og sér á erfitt með að klikka.

Snillingurinn Ásta bjó líka til þetta glæsilega kynningarmyndband.

Miðapantanir eru hér.
Og það borgar sig að panta fljótlega þar sem sætafjöldi í sal er takmarkaður.

Einnig,
Nú eru aðeins örfáar sýningar eftir af stórvirkinu Epli og eikur sem Hugleikur sýnir í Möguleikhúsinu. Og þær eru óðum að fyllast. Miðapantanir eru hér.

Ætli þetta sé ekki nóg í bili?

Nei, djók...

Auðvitað er leikfélagið mitt fallegt og skemmtilegt.

Ég er hins vegar einhverf. (Las Undarlegt háttarlag hunds um nótt og komst að því.) Ef ekki er allt ákveðið og skipulagt fyrirfram, upp á mínútu, og fullkomlega fyrirsjáanlegt, þarf ég bara að gubba.

Og nú er ég búin að fara á fund og skipuleggja margt. (Reyndar alveg gífurlega margt. En þetta er allt komið inn í tímaplan.) Svo mér líður aðeins betur. Svo er frumsýning á laugardaxkvöld. Alltaf gaman á frumsýningum. Er það ekki?

Og þessari stjórnarsetu í Hugleik ætla ég ljúka með því að skipuleggja yfir mig og sjá um miðasölur á þremur verkefnum í einu. Sem sum eru á sömu kvöldunum. Vill einhver vera memm?

Ujjjj

Þetta er búið að vera mjööög gott frí.

En á morgun komum við til borgar Höfuðsins. Það er búið að boða mig á einn fund klukkan 18.00. Verð í miðasölu á einu leikriti á fimmtudag, föstudag og sunnudag. Og miðvikudag og fimmtudag. Veit ekki hvort ég fæ einhverja til að vera þar með mér. Frumsýning á öðru leikriti á laugardag. Veit ekki neitt um það. Ef ég kemst á fund um það á morgun kemst ég sennilega að því að það er bullandi óánægja með eitthvað sem ég þarf örugglega að galdra mér tíma til að gera eitthvað í. Einþáttungaprógramm eftir næstum tvær vikur. Veit ekki hvort fleiri en tveir einþáttungar verða í því, samt.

Hef persónulega mikið að gera í ýmsu sem mig langar mikkklu meira að vera að sinna í vikunni. Og skiptir talsverðu máli fyrir framtíð mína.

Mig langar síst aftur í bæinn. Er meira að huxa um að fara að grenja og fela mig og fjölskylduna bara í fjárhúsunum fram yfir aðalfund.

Minnið mig á að hætta í leikfélaginu.

Páskadag!

Á páskadag fæ ég alltaf eina línu úr Sálum Jónanna á heilann. Svolítið pirrandi, þar sem þetta er eiginlega hvorki né laglína og aðallega brandari.

Í dag á ég líka brúðkaupsafmæli. Í eitt ár höfum við Rannsóknarskip nú verið í hnappheldunni og það hefur nú verið bæði gaman og yndislegt á hverjum degi. Það er auðvitað hreint frábært að vera giftur svona æðislega góðum og skemmtilegum manni. Það verður nú ekki af því skafið.

Enda held ég að ég sé að hafa gott af því. Og ýmislegt er að brjótast um í hausnum á mér á öllum vettvöngum lífs míns sem ég er að hamast við að skrifa niður og leggja drög að.
Eitthvað af því kemur kannski í ljós síðar.

Í gærkvöldi sátum við síðan hjá foreldrum mínum með rauðvín, eftir að hafa horft á Mótorhjóladagbókina hans Che. Kannski voru það áhrif frá henni, en allt í einu vorum við farin að spekúlera í að fara í gasalegt ferðalag í sumar. Með börn og buru og huxanlega mömmu mína líka. Veit annars einhver hvað kostar að leigja húsbíl í Skotlandi?
Það kostar allavega ekkert að láta sig dreyma.

Afsakið hlé-ið

En það er bara búið að vera eitthvað svo mikið að gera hérna úti um allt land.

Það er verið að bíða eftir mér, ég á að fara að spila Risk við systkini mín og eiginmann, en áður en ég geri það get ég ekki látið hjá líða að setja hlekk á einstaklega merkilega manneskju sem sendi mér afmæliskveðju í kommenti. Þannig er nefnilega að á seytjánda afmælisdaginn minn eignaðist ég litla frænku. Hún heitir Guðný Ólafía Guðjónsdóttir og ólst upp á ættaróðali föður míns, Hænuvík við Patreksfjörð. Hugleikarar muna kannski eftir einþáttungnum Gegnumtrekk, sem var eftir mig og ömmu mína, sú amma er sameiginleg amma okkar Guðnýjar og bjó lengst af í Hænuvík. En þeim merka stað er Guðný einmitt með mynd af á blogginu sínu.

Hér bloggar Guðný, frænka mín, sem á næsta afmælisdegi okkar verður akkúrat helmingi yngri en ég.

Og nú fer ég að fjölmyrða fjölskylduna.

Vika Dimbils

Allt liggur í vellystingum fyrir norðan. Freigátan berst fyrir því af mikilli elju á hverjum degi að fá að borða lambakúk. Hingað til hafa aðrir haft betur.
Við komumst líka að því að fara með fjórtán mánaða brjálæðing í fermingarveislur er mikil vinna. Efast um að nokkur í fjölskyldunni hafi bætt á sig einu einasta grammi, þrátt fyrir einlægan brotavilja þegar menn fengu færi á hlaðborðinu.

Förum austur ekki á morgun heldur hinn, á degi skírs. Skiljum Smábát eftir við hægri hönd föður síns.

Og á morgun ætla ég að verða 33 ára og fá að sofa þvílíkt út.