Kennitöludagur

Það verður að blogga þegar er svona flott dagsetning. Skora á alla sem eru óléttir og innan skekkjumarka með fæðingardag að drífa sig nú. Enginn ætti að láta svona kennitölu framhjá sér fara!

Annars er ekkert sérstakt í fréttum. Er búin að fá tímasetningu á gítartímana mína. Þá er að fara að æfa sig. Bara eftir að borga. (Áts.) En þar sem Bjarni Ármanns er að fá 800 milljónirnar sínar niðurfelldar, þá hlýtur nú bara að vera tímaspursmál um hvenær kemur að mér og öllum hinum plebbunum sem eyddi peningunum sínum bara í eitthvað skynsamlegt eins og þak yfir höfuðið.

Er það ekki? Jóhanna?

Annars á ég bæði pott og pönnu og er ekki feimin við að notaða!
Eins oft og þarf áður en einhverju skikki verður komið á málin og einhver af öllum þessum bráðsnjöllu leiðum, sem alveg rignir þessa dagana, verður beitt til að ég þurfi ekki að borga bruðlið í Bjöggunum, Björnunum og öllum bévítans bjálfunum.
Skiljiðiða?

Af heimavígstöðvunum er það annars helst að frétta að Hraðbátur borðar alltaf gríðarlega vel í leikskólanum. Ég óttast að fá aukareikning fyrir fæðinu hans. Systir hans borðar hins vegar ekki neitt, svo það væri þá vonandi hægt að draga af hennar. Nú verður farið í umræðuátak heima fyrir og athugað hvort eitthvað lagast með hana.

Móðurskip hamast við að borða lítið og finnst árangurinn eitthvað lengi að láta sjá sig. Ætlar að hlaupa reglulega langt þegar Rannsóknarskip kemur úr golfi. Er annars farin að eiga eitt og eitt einstaklega úldið kvöld. Líklega haustið og svona. Lagast vonandi bara með fækkandi kílóum og meira hörbi, jóga og gítarnámi sem hvurutveggja hefst í næstu viku.

Já, einmitt. Ég ætlaði að æfa mig...

Vort daglegt...

Ég hélt að bloggið myndi græða feitt á öllu hanginu hér yfir skræðunum og huxinu í doktrinu. En öðru er nær. Verkefnin svoleiðis hlaðast upp og láta ekki bíða eftir sér og vinnudagarnir eru svo fljótir að líða að það er hreint engin hemja. Í allan dag er ég til dæmis búin að sitja yfir yfirlesnum drögum að doktorsverkefni, aðallega heimildaskránni. Hvernig í rassgatinu stendur á því að maður getur verið á fjórðu háskólagráðu (farinn að stefna hraðbyri í að fá vinnu á bensínstöð) og er ekki enn búinn að temja sér einhverja samræmda heimildaskráagerð? Ég held ég geri þetta aldrei eins. Og þarf alltaf að fletta uppá hvernig þetta má og á að vera.

Djull.

Allavega, var heima í gær með augnsýktan Hraðbát. Einstaklega þægilegt að vera bara með eitt barn. Enda tókum við til höndum, tókum til og þrifum ógurlega og þvoðum örugglega fjórar þvottavélar. Í dag er síðan stuttur hlaupadagur. Það þýðir að ég hleyp svona kannski 3 - 4 km. Á morgun er langur hlaupadagur og þá hleyp ég eitthvað hátt í 10. Þriðja hvern dag hleyp ég síðan ekki neitt en hjóla þá eða syndi eða geri eitthvað annað í staðinn. Þannig er hið rúllandi á þremur dögum prógramm. Þyngd og lögun stendur samt enn í stað eftir langlegu ágústmánaðar. Planið er samt að minnka um fimm kíló í viðbót og fjölmarga sentímetra fyrir jól. Hörbalæf og önnur fæðubótarefni eru étin í akkorði, en fátt eitt annað. Svo Átak Ofurheilsunnar er enn í gangi.

Svo held ég að gítarnámið hefjist í næstu viku. Enn er á huldu hvernig stundaskráin í því lítur út. En ég er fjarskalega spennt. Svo á að sækja um styrk fyrir spánnýtt leikrit sem enn er ekki nema frekar óljós hugmynd. Af því að það eru nú allsstaðar péningar.

Öll veröldin er...

Doktorsverkefnið mitt er um leikhús og leiklist.
Svo sit ég í stjórn Bandalags íslenskra leikfélaga.
Í vetur ætla ég svo að vera einn leiklistargagnrýnenda Leiklistarvefjarins.
Í frístundum ætla ég svo að vera dugleg að skrifa leikrit og vera í leikfélagi.

Veröldin mín er ferlega leiksvið þessa dagana.
Skyldi kona einhvern tíma fá nóg af þessu?

Nýnemadagar

Þessa dagana er brjálað stuð hér á háskólasvæðinu. Oft tjúlluð tónlist úti um allt og fólk í allskonar uppátækjum og -komum. Éld þetta hljóti að vera einhver góðærisuppáfinding. Ekki man ég eftir neinu svona þegar ég var að byrja hér, á tímum þjóðarsáttar. Og núna er maður bara gamall fartur, og orðinn frekar heimaríkur eftir að hafa mikið hangið hérna í ein 15 ár, og vill ekki sjá svona húmbúkk. Vill bara að fólk fari að hætta þessum fíflalátum og hávaða og fara að læra og hætti að hagna endalaust í röðum allsstaðar þar sem ég þarf að komast að á Háskólatorginu.

Í dag er meira að segja NýnemadagurINNNN! Mælt með að fólk geri kennsluhlé eftir hádegi.
Ætla að láta undan þrýstingi.
Gefa sjálfri mér "kennsluhlé" eftir hádegi og fara í Kringluna.

Verfremdung

Brecht talar um eina aðferð við smíðar pólitískra ádeiluverka fyrir leiksvið sem hann kallar Verfremdung. Útleggst gjarnan á íslensku framandgerving. Það er að segja, það sem er eðlilegt og viðtekið er gert skrítið á leiksviði. Sýnt í öðru ljósi þannig að það er ekki lengur sjálfsagt eða eðlilegt. Brecht notaði þessa aðferð mikið við að deila á stríð og stríðsrekstur.

Í byrjun október gerðist sá merkilegi atburður á Íslandi að samfélagið framandgerðist. Þegar íslenska efnahagsundrið kom út úr skápnum sem íslenska efnahagsklúðrið snerist næstum allt í samfélaginu á haus. Allt sem áður var merki um velsæld og velgengni (og hamingju?) varð táknmynd heimsku og skuldafens (og óhamingju?).

Kannski gerir þessi viðsnúningur ádeiluhöfundum kreppunnar erfitt fyrir?

Já, nú finnst mér gaman.

Það er ljóst að doktorsverkefnið mitt á eftir að koma talsvert við sögu á þessum vettvangi. Þyki mönnum vangaveltur þessar eitthvað áhugaverðar, stay tuned. Ef ekki... ja, þetta er kannski ágætt fyrir svefninn?

En ég verð nú líka að halda áfram að skrifa annað slagið um börnin og buruna.
Fyrir mömmu.

Já, svo á skáldkonan amma mín fyrir Westan afmæli í dag og er 85 ára. Ég ætlaði að fara til hennar í leikferð með Gegnumtrekk í tilefni dagsins, en svo fékk ég bara kvef. Enda þeir Ljótu í Hrísey og ekki til viðtals. Jæjajæja. Geri þetta bara þegar hún verður níræð.

Til hamingju, amma.

Piscator og Brecht og fleira skemmtilegt...

Er að lesa Piscator á milljón en var að koma úr tíma í Brecht-i. Það var alveg hroðalega gaman. Og á köflum er mjög undarlegt að lesa Piscator. Til dæmist þegar maður rekst á textabrot eins og þetta:

But the unfortunate Republicans went on deceiving themselves. They were not guiltless and they added to their own guilt by refusing to recognize their error, by succumbing to their own reactionary convictions and sanctioning the real guilty men later. Bad and stupid, but consistent.
(Erwin Piscator, The Political Theatre, 1929)

Svo las ég brot úr and-andbyltingar áróðursverki, frá ca. 1921 sem heitir Russia's Day. Persónur eru teiknimyndalegar persónugerðir af fyrirbærum:

World Capital: (Dressed in a giant moneybag with a stockbrokers top hat): Silence! (To the Diplomat) Have you given orders for force to be used ruthlessly against anyone who infringes the sacred rights of property? Speak up!

Diplomat: Your Majesty's power embraces the entire world that has been bestowed upon man. But your Majesty's omnipotence is gravely threatened by the masses of workers in their struggle for power.

World Capital: Trample the masses underfoot!

[...]

Diplomat: It is clear that freedom for the masses would be the downfall of us all.

World Capital: Downfall? Anybody who is not with me is against me!

....!

Þarna þurfti ég nú bara að fá mér kaffi.

31.08.2009

Í dag virðast allir vera í svona "að-byrja-í-skólanum" fíling. Allt í einu er háskólasvæðið fullt af fólki og ég varð skíthrædd við að fara út á Háskólatorg áðan. Hætti við Bóksöluna.

Og í dag ætlar OR að selja sinn hlut í HS til Magma.
Á íslensku:
Í dag ætlar Orkuveita Reykjavíkur að selja hlut sinn í Hitaveitu Suðurnesja til erlends fyrirtækjarisa sem heitir Magma Energy. Í von um skjótan gróða. Svo hægt sé að halda áfram að bruðla. Aðeins lengur. Hvað gerist þegar hlutabréfakrúsandi útlendingarnir verða búnir að hækka gjaldskrár þannig að ekki verði lengur búandi á Suðurnesjum er síðan ekki vandamál Orkuveitunnar. Greinilega. Skammsýni og fávitaháttur. Ef Steingrímur stoppar þetta ekki á síðustu stundu, hvernig sem hann fer að því, veit ég ekki hvað til hans friðar heyrir.

Mér sýnist allir sem vita um hvað málið snýst vera á móti þessu. Fullt af fólki nennir ekki að kynna sér málið. Enda búið að flækja það, vísvitandi, með allskonar asnalegum skammstöfunum og orðaleppum.

En það sem þetta þýðir er þetta:
Heita vatnið og rafmagnið, sem Íslendingar eiga og hafa hingað til getað notað tiltölulega ódýrt... (samt dýrara en hægt væri vegna flottræfilsháttar orkuveitanna... hefur einhver komin inn í nýja Landsvirkjunarhúsið?)... eru að fara að missa yfirráðin á þessum auðlindum í hendur útlendinga sem ætlast til þess að þessar fjárfestingar skili hagnaði. Og það eins miklum og hægt er að kreista út úr almennum notendum á Íslandi. Næstu 65 árin! Menn hafa ekki völ á öðrum veitum í rafmagni og vatni. Ef menn búa á Suðurnesjum borga menn sín orkuafnot til Magma. Til Kanada. Og ef þetta gerist með orkuveitur víða um land hugsa ég að fullt af fólki flytji í kjölfarið. Ég mun allavega hugsa mig vandlega um.

Og það er strax byrjað. Ekki er hægt að veita stjórnvöldum frest til að finna pening, vegna þess að Magma þarf að segja eitthvað við HLUTABRÉFAMARKAÐINN í dag! Sem sagt, erlendir hlutabréfamarkaðir stjórna því hver á auðlindirnar okkar, núna.

Mér er sama hvernig. Nú þarf að ríkisvæða allt draslið. Strax í dag. Stjórnendur Orkuveitu Reykjavíkur eru greinilega fábjánar og ekki treystandi fyrir neinu mikilvægu. Hugsa ekki lengra en nef þeirra nær.

Já, ég er fokkíng brjáluð.