Tíminn er merkileg skepna
Hafiði tekið eftir því að þegar maður hefur allt of mikið að gera, þá verður manni miklu meira úr verki með alla skapaða hluti?

Núna eru til dæmis að ná saman hjá mér tvö brjáluð leikhúsverkefni, auk þess sem ég er að reyna að ná einhverri fótfestu í nýrri vinnu (sem gengur misjafnlega) og ég sé satt að segja ekki fram á að hitta sjónvörp mikið næstu vikur, eða rúmið mitt.
Er hins vegar búin að taka upp hið stórniðuga skipulag Spánverja að hafa síestu á milli klukkan 1 og 5 á daginn.

Sá tími er til margra hluta nytsamlegur og ég er t.d. farin að taka upp á þeirri undarlegu nýbreytni að setjast niður og vinna í hálfkláruðu leikritunum mínum. Það er nú ekki lítið gaman og löngu kominn tími til...

Svo skemmtilega vill til að einn tímanýtnasti maður sem ég þekki á einmitt afmæli í dag, í miðri sláturtíð og er það viðeigandi.
Til hamingju pabbi minn, myndi slátra nokkrum Austurlömbum í dag, þér til heiðurs, ef ég ætti úti kindur...

Góðir Íslendingar,
til hamingju með nýja forsætisráðherrann!
Líður ekki öllum miklu betur núna?
Er þetta ekki bara allt annað líf?

Bráðum kemur eflaust mikklu betri tíð fyrir vikið með blóm í haga, betri bílum, yngri konum, eldra viskí og meiri péning.

Vona bara að álfurinn hann Halldór verði okkur ekki til skammar og að utanríkiströllið Davíð fari nú ekki alveg yfirum í viðleitni sinni við að styrkja stjórnmálasamband okkar við tippaétandi einræðisherrann í Miðbaugs-Gíneu.

Annars er íbúðaleitin sem ég var búin að hóta endalausri bloggun um í biðstöðu á meðan beðið er örlítið meira peningaflæðis. Og um leið fer náttúrulega ekki hjá því að draumaíbúðin verði alltaf flottari og flottari, staðsetning verður alltaf afmarkaðri og afmarkaðri, og svo eru kröfur farnar að stangast á. Bráðum þarf ég að sætta mig við þá staðreynd að baðherbergi í Hlíðunum eru ekki stór.

Það endar meððessu... Stefni á eigið húsnæði fyrir 2010.

Þetta með peningana er dularfullt.

Nú er verið að lækka vexti á húsnæðislánum hægri og vinstri. Þar sem ég á ekki hús þá geri ég mér enga grein fyrir því hvað það þýðir, nema þá eitthvað á þá leið að einhverjir hljóta að vera að græða minni peninga.

Svo er ég að fara að taka einhvers konar húsnæðislán, og þá eignast ég fullt af ímynduðum peningum.

Það virðist líka vera nóg af peningum á Íslandi, þrátt fyrir að undanfarin ár höfum við aðeins selt til útlanda einhverjar örfáar fisklufsur en á sama tíma flutt inn ósköpin öll af gallabuxum.

Eru kannski allir peningar í heiminum orðnir ímyndaðir? Er kannski nóg að ákveða að maður eigi fullt, og þá á maður það.

Það væri nú gaman að setjast niður og telja og gá hversu margar krónur í raun og veru eru í heiminum.

Jahjarna. Einhverjir 4 dagar án bloggs! Þetta er náttlega algjörlega óafsakanlegt.

Skipulagið fór bara einhvern veginn allt í fokk. Það er helst að frétta að ég er alveg dragúldin og geðvond. Átti langþráð frí í dag, en það er ennþá fyrir hádegi og ég er alltaf að muna eftir fleiru og fleiru sem hefði helst þurft að gerast í gær. Er að verða hreint vitlaus.

Fundur í samstarfsverkefni Hugleix og Leikfélax Kópavox í gær, sem gengur undir vinnuheitinu M&M og virðist það ætla að verða spennandi verkefni.

Og í gær féll niður sýning á Beiskum tárum Petru von Kant sökum miðapantanaleysis. Hvað er eiginlega í gangi? Hafa menn bara engan áhuga á þýskum búksorgardrömum frá 8. áratugnum, eða hvað? (Hihhh...) Allavega, síðustu sýningar eru um næstu helgi. Og það er dómur um okkur í Mogganum í dag, hef ég heyrt, veit ekki hvort ég á að leggja að fólki að lesa hann þar sem ég hef ekki séð hann sjálf.

Allavega, úld, úld, geðvonsk, geðvonsk, best að gera eitthvað.
Grrrr...

Átti alltaf eftir að setja hlekk á síðuna þar sem innihöld og athugasemdir við þættina Sögumenn samtímans birtust í sumar. Hér er hann.

Annars bara, rignir og rignir. Hálfviðgerða þakið á handritasafninu lekur og lekur. Og ég nenni ekki með bílinn í viðgerð og skoðun af því að ég þarf alltaf að vera að nota hann.

Nú er sýning í kvöld þannig að ég kem ekki til með að vita fyrirfram hvað verður í DV/Fréttablaðinu á morgun. Jæks.

Vandlifað í þessum heimi.

Tilkynningar

Útvarpsþátturinn Sögumenn samtímans er kominn á einhvers konar segulþráð. Þetta verður síðasta afrek mitt í þeirri ágætu þáttaröð. Allir sem nenna leggi við hlustir á rás 1 um klukkan 18.35 á laugardaginn nk., þann 11. september. (Og þið megið getta einu sinni um hvað þátturinn er.)

Svo eru sýningar á Beisk tár Petru von Kant í gangi. Nú eru aðeins 5 sýningar eftir og þar af er orðið uppselt á eina þannig að menn þurfa að fara að drífa sig ef þeir ætla að sjá. Sýningarnar sem eftir eru, eru:

Miðvikudag 8.9. kl. 20.00 - Uppselt
Föstudag 10.9. kl. 20.00
Laugardag 11.9. kl. 20.00
Föstudag 17.9. kl. 20.00
Laugardag 18.9. kl. 20.00

Sýnt er í gamla Lækjarskóla í Hafnarfirði (við tjörnina) og miðapantanir eru í síma 848 0475. Miðinn kostar skitinn 1000 kall og sýningin tekur rúman klukkutíma í flutningi, svo þetta fer ekkert með allt kvöldið. Svo er ég komin í kvöldvinnu þannig að þetta gæti orðið síðasti séns til að sjá mig dingla mér á sviði, allavega á næstunni. Svo drífa sig nú!

Þá held ég að ekki sé fleira sem ég geri á opinberum vettvangi þessa vikuna, enda er þetta nú slatti..

Ég er að huxa um að skoða eina íbúð í dag. Um að gera að gera sollis í þessari líka haugarigningu, maður sér þá hvort hún lekur.

Að Byrja á Byrjuninni.
Jæja, þá er að fara að reyna að eyða peningunum sem maður er að fara að eignast. Næsta mál á daxkrá: Að skoða íbúðir í eigin persónu, í stað þess að liggja bara slefandi yfir myndunum á netinu.

Ætla að byrja á að skoða það sem mér líst á sem er:
a) í austurbænum
b) ódýrara en 9 milljónir

Sá flokkur samanstendur af kjöllurum og hanabjálkum, en það er kannski bara allt í lagi. Hver þarf svo sem að sjá út? Er kannski bara bjánagangur að vilja endilega geta staðið uppréttur heima hjá sér? Frá grundvallarkröfu um baðkar vík ég nú samt ekki!

Þetta er nú örugglega alveg illa leiðinlegur prósess. Enda sennilega á að kaupa það fyrsta sem ég sé, bara út úr leiðindum.

Af hverju fást annars íbúðir ekki bara í venjulegum sjoppum? Maður ætti bara að geta labbað inn í Svarta Svaninn og sagt:
"Hurru, ég ætla að fá tvo pakka af Salemi og eina íbúð með baðkari. Altílæibleess."