Þá er komin, tjah, eiginlega vanhelgi. Stjórnarfundur hér á Bandalaginu í dag, og ef við náum ekki að klára hann, líka á morgun, sýningar hjá Hugleik í kvöld og annað kvöld... og svo verður bara aftur kominn mánudagur. Svona á þetta að vera, annars eru helgar svo gjarnan leiðinlega gagnslaus tími. (Sérstaklega fyrir fólk sem á að vera að skrifa ritgerðir og leikrit og nennir því ekki.)

Fór á frumsýningu hjá Leikfélagi Kópavogs í gærkvöldi á leikritinu "Smúrtsinn" í leikstjórn Harðar Sigurðarsonar. Það var algjör gargandi öskrandi snilld á alla kanta, frábær leikhópur, skemmtileg nálgun á þessu klikkaða verki, flott útlit, tónlistarnotkun, lýsing og bara hvergi brotalöm. Félaginu og heiminum öllum til algjörs sóma. Þar fyrir utan finnst mér Hjáleigan í Kópavogi vera einn skemmtilegasti leiksalur sem ég hef séð. Svartur ferkantaður kassi, ekki of stór, sem er síðan hægt að snúa og gera við hvað sem hvur vill. Næst þegar ríkisstjórn Íslands fer á málamyndaflipp og ætlar að ausa peningum í húsbyggingar um allt land (til að komast hjá því að styrkja starfsemina af einhverju viti til frambúðar) finnst mér að öll starfandi leikfélög ættu að fá eitthvað svipað til umráða.

Búið að auglýsa skólann góða í Svarfaðardalnum. Skemmst frá því að segja að eitt námskeiðið fylltist á um 6 klukkutímum eftir að opnað var fyrir skráningar. Þar af leiðandi þarf sennilega eitthvað að endurskoða skráningafyrirkomulag þar sem ólíklegt er að allir bæklingar í "sneilmeil" hafi verið komnir til skila. Þetta er hins vegar alveg splunkunýtt vandamál, eftir því sem ég best veit, síðast þegar ég var að vinna hérna þá vorum við nú yfirleitt frekar að naga á okkur neglurnar yfir því hvort lágmarksþátttaka næðist, og stundum fram yfir umsóknarfrest. Reyndar eru 3 námskeið af 4 sem við getum verið í þeim pakka yfir. En svona er þetta, það er greinilega tískan að vera trúður.

Og ég er mjööög upptekin af því þessa dagana að vera 29 ára. Enda eins gott að nota tímann!

Á bara að vera rok og rigning það sem eftir er eilífðar? Eða hvað? Allavega búið að vera síðan elstu menn muna og sér ekki fyrir endann á ólátunum. Ég vissi ekki að það væri til svona mikið loft og vatn.

Annars, rólegheitin sem átti að bresta á með eftir frumsýningu urðu ekki, eiginlega bara galið að gera á öllum vígstöðvum. Skólabæklingar fyrir sumarið að fara í póst, Leikfélag Hafnarfjarðar að fara á fullan skrið (var einmitt á leikæfingu þar í gærkvöldi þegar formaður Leikfélags Fljótsdalshéraðs hringdi í mig í misgripum til að boða mig á stjórnarfund hjá því ágæta félagi. Maður getur alltaf á sig blómum bætt...) Helgin stefnir í skemmtilegt óefni, frumsýning hjá Leikfélagi Kópavox á föstudaxkvöld, stjórnarfundur hér á Bandalaginu á laugardag og sýningar hjá Hugleik laugardax og sunnudaxkvöld. Á milli alls þessa mjakast ritgerðin, hægt og sígandi, en hún á einmitt að skilast í uppkastaformi á mánudag.

Og ég er ekki ennþá búin að koma heimaprjónuðu afmælisgjöfunum á afmælisbörnin frá í desember og janúar. Þarf að búa til tíma til að hitta keeellingarnar mínar einhvern tíma áður en þetta ár er úti.

Sipp og hoj...

Stalst í vinnuna til að prenta aðgöngumiða fyrir Hugleik, hélt ég væri á fínum tíma þangað til ég komst að því mér til mikillar skelfingar að úrið mitt er stopp.

Er þar að auki skelþunn eftir alltof skemmtilegt kvöld með Vinum Dóra.

Semsagt, sýning í kvöld, sem ég er að verða of sein á, rok og rigning úti, verður stuð að þvælast í kringum Tjarnarbíó í skjóllitla búningnum mínum.

Mottó þessarar sýningar er: Allir í beina röð og reyna svo að bjarga handritinu!
A la leikdómur Lárusar á leiklist.is. Það ætlum við einmitt að fara að gera núna.

Skemmtilegir og misjákvæðir leikdómar virðast vera að skila fínni aðsókn, og það er nú gott, Hugleikur er blankur.

Rokk on!

Var veik í dag og fór ekki í vinnuna.
En, allt kom fyrir ekki, verkefni elti mig, er búin að sitja yfir þýðingaverkefni dauðans í allan dag með hor og slef. (Græddi reyndar á því nokkra tugþúsund kalla.) Nú er semsagt bara að láta sér batna fyrir sunnudag, en þá er æfing og sýning á Sirkus en það ágæta verk fær misjafnar viðtökur. Það vekur vonandi bara forvitni, Hugleikur er jú blankur sökum húsakaupa.

Var að fatta að ég hef ekki talað við forfeður mína í laaaangan tíma, ætla að nota einangrunina í Hafnarfirði í kvöld til að hringja í mömmu. Unnustinn er að elda handamér hamborgara með ÖLLU. Nammnamm og fitandi.

Jæja.
Þá er ég búin að upplifa hátind lífs míns og get þess vegna dáið hamingjusöm. Aldrei datt mér í hug að ég ætti eftir að upplifa nýjar víddir af hamingju við að hlýða á tvo miðaldra kennara að norðan fremja eitthvað millistig á milli uppistands og tónleika. Það eru greinilega engin takmörk á því hvað er hægt að gera. í tvo klukkutíma var mér komið skemmtilega á óvart ca. þrisvar á mínútu. Ég vissi t.d. ekki að hægt væri að:
- spila sóló með þremur blokkflautum, uppþvottahanska og hárþurrku.
- gera stál og hníf að skemmtilegu lagi með aðstoð Hallbjörn Hjartarsonar
- spila fjórhent á gítar á meðan annar er fyndinn og hinn hræddur
- syngja Guttavísur við lagið af Whiter Shade of Pale

...svo fátt eitt sé nefnt. Dúettinn Hundur í óskilum er eitt það skemmtilegasta sem nokkurn tíma hefur fyrirfundist í heiminum.

Óstöðvandi gleði og hamingja.

Í þessari viku hefði ég þurft að vera gífurlega dugleg að skrifa ritgerð.
En, úps, upp dúkkuðu á mínu heimili fyrstu seríurnar af sjónvarpþáttunum Angel sem ég hef ALDREI horft á. Forgangsröðun fór þess vegna í hundana. En í dag skal gerð heiðarleg tilraun til að koma sér í gáfugírinn.

Jahá. Og það lítur út fyrir að í næstu forsetakosningum fáum við að velja á milli Ástþórs Magnússonar og Snorra Ásmundssonar. Athygliverðir kandídatar til að sitja drottningaveislur fyrir hönd lands og þjóðar. Ég vil helst ekki gera upp á milli. Er ekki hægt að hafa annan sem forseta og hinn sem varaforseta? Ég vildi til dæmis gjarnan vera fluga á vegg þegar Ástþór mætir útataður í svínsblóði í partý í hvíta húsinu til að mótmæla hernaðarstefnu Bandaríkjanna og þegar Snorri biður Betu Englandsdrottningu að gera sig að heiðursfélaga í bresku konungsfjölskyldunni.

Þá fyrst yrði nú stuð að vera Íslendingur!

Og gleðilegan bjór-gær. Gleymdi því.
Nú bíðum við með endurnar í hálsunum eftir dómum á nýjasta Hugleixafrek. Hóf annars óformlega störf með leikfélagi Hafnarfjarðar í gær. Það var öðruvísi, fyrir utan fyrirbæri sem heitir "bolti" og virðist vera að tröllríða öllum leikfélögum suðvestan lands þessi árin. En bara, dædur hópur og verður sjálfsagt gaman að leika við hann.

Nú held ég að lokasprettur sé á því að skipuleggja skólann í dalnum Svarfaðar í sumar. Enn verið að mjatla málin um hver getur kennt höfundasmiðju. Held ég verði eiginlega að fara, hvur svosem það verður, annars fæ ég aldrei spark í rassinn til að klára "Villidýrin" mín. Svo förum við bara að auglýsa og skrá, ef einhverjir áhugasamir um það mál eru lesendur hér.

Yfirstandandi er lokasprettur í fyrsta uppkasti af MA ritgerð, því skal skilast til leiðbeinanda annan mánudag. Að því afloknu fer að glitta í langþráða útskrift, sem breytir reyndar svosem engu nema því að þá hangir þessi ritgerð ekki lengur yfir hausnum á mér eins og óveðurský og að ég get lifað í þeirri sælu vissu að geta hafið doktorsnám hvenær sem mér sýnist.

Annars langar mig gífurlega að fara að leggjast í einþáttungaskrif eða fara að byrja á einhverju af þeim fjölmörgu öðrum leikritasmíðum sem ég var víst einhvern tíma búin að segjast ætla að gera. Ég held að fyrirliggjandi verkefnalisti núna sé að verða ca. 10 ára langur. (Lengri á mínum vinnuhraða þar sem ég er óforbetranlegur letipúki.)

Svo eru bara fríkvöld í hrönnum í þessari viku. Jahérnahér!